Əli Məsimli: "Ermənilər Ramil Səfərov məsələsindəki uğursuzluqlarını heç cür həzm edə bilmir"

Millət vəkili, tanınmış siyasətçi Əli Məsimli ermənilərin Kəlbəcərdə əsir düşmüş azərbaycanlı girovların qarşılığında Ramil Səfərovu onlara təhvil verməyi təklifini Ölkə.az-a verdiyi açıqlamasında şərh edib.

"Erməni tərəfi özü də yaxşı bilir ki, Kəlbəcər girovları üzərində təşkil olunan həmin qurama məhkəmənin heç bir hüquqi əsası yoxdur. Ona görə də ermənilər bu hadisə ətrafında nə qədər mümkünsə, o qədər şou yaratmaq, bu hadisədən həm Ermənistan daxilində, həm də beynəlxalq səviyyədə siyasi məqsədləri üçün istifadə etmək istəyirlər. Həmin məqsədlərdən biri də bu hadisədən həm bütövlükdə təbliğat vasitəsi kimi istifadə etmək, həm də Ramil Səfərov məsələsini yenidən gündəmə gətirməklə girovların qaytarılması müddətini uzatmaqdır. Ortaya belə sərsəm fikir atıblar ki,onlar kəlbəcərli girovlardan birini erməni zabiti Qurgen Markaryanı öldürmüş Ramil Səfərovla dəyişməyə razıdır.

2004-cü ilin yanvarında Macarıstanda erməni zabitinin qətlində günahlandırılaraq barəsində ömürlük həbs qərarı çıxarılan Ramil Səfərov 8 il sonra - 2012-ci il avqustun 31-də Azərbaycan prezidentinin səyi ilə Budapeşt şəhərindəki həbsxanadan çıxarılaraq Bakıya gətirilib. Daha sonra prezidenti İlham Əliyevin sərəncamı ilə əfv olunub. O, Azərbaycan Silahlı Qüvvələrində xidmətə bərpa olunub. Bununla da ermənilər Ramil Səfərov məsələsi ətrafında qurduqları çoxşaxəli təbliğat imkanlarından məhrum olublar. Erməni tərəfi Ramil Səfərov məsələsindəki uğursuzluqlarını heç cür unuda, heç cür həzm edə bilmirlər.Ona görə də şans düşmüşkən Kəlbəcər girovları üzərində təşkil olunan həmin qurama məhkəmənin nəticələri ilə Ramil Səfərov məsələsini birləşdirib, beynəlxalq səviyyədə bu şounu yeni müstəviyə sürükləmək istəyirlər. Amma ermənilərin bu sərsəm təklifi heç bir hüquqi mahiyyət də kəsb edə bilməz və nəticəsinin fiaskoya uğrayacağı qabaqcadan məlumdur.

Dilqəm Əhmədov və Şahbaz Quliyevin girov götürülməsi dövründə onların azad edilməsi Azərbaycan hökumətinin gündəliyində duran ən ciddi məsələlərdən birinə çevrilib. Azərbaycan prezidenti İlham Əliyev ATƏT-in Minsk Qrupunun həmsədrləri ilə görüşdə Ermənistan tərəfindən girov götürülən Dilqəm Əsgərov və Şahbaz Quliyevin tez bir zamanda azad olunması üçün onlardan bu istiqamətdə ciddi addımlar atmağı tələb edib. Bununla yanaşı erməni girovluğunda olan Dilqəm Əsgərov və Şahbaz Quliyevin azad edilməsi ilə bağlı bütün beynəlxalq təşkilatlara, o cümlədən BMT-nin baş katibinə, Avropa Şurasının və ATƏT-in rəhbərlərinə, Beynəlxalq Qızıl Xaç Komitəsinin prezidentinə, insan hüquqları komissiyalarının sədrlərinə rəsmi müraciətlər göndərilib. Bir sıra qərb ölkələrində Kəlbəcər giravlarının azad edilməsi tələbi ilə tədbirlər təşkil olunur. Düşünürük ki, həm dövlət, həm qeyri-hökumət təşkilatları və həm də xaricdə yaşayan soydaşlarımızın birgə səyi ilə həyata keçirilən həmin tədbirlər öz bəhrəsini verəcək".

Xatırladaq ki, Dağlıq Qarabağdakı separatçı rejimin qondarma prezidentinin “mətbuat katibi” David Babayan “Dağlıq Qarabağ hakimiyyəti” kəlbəcərli girovlardan birini erməni zabiti Qurgen Markaryanı qətlə yetirən Ramil Səfərovla dəyişməyə razı olduğunu bildirib. O, kəlbəcərli girovların birtərəfli qaydada qaytarılmasının mümkün olmadığını bildirib.

Zəruri qeyd: "Azərbaycanın işğal altındakı Kəlbəcər rayonundan olan Dilqəm Əhmədov və Şahbaz Quliyev erməni işğalçıları tərəfindən girov götürülüb. Onlar üzərində qurama bir məhkəmə təşkil olunaraq Dilqəm Əsgərova ömürlük, Şahbaz Quliyevə isə 22 il müddətinə azadlıqdan məhrumedilmə cəzası verilmişdir.

Fatimə İbrahimova
Ölkə.az