Zərdüşt Əlizadə: "Təbliğatda da müharibə abı-havası duyulur"

"Moskva münaqişənin qaynar fazaya keçməsinə imkan verməyəcək"

“Erməni əsgər Azərbaycanın işğal olunmuş ərazilərində nə edir? Erməni əsgər Ağdamda nə axtarır? Əgər o öldürülmək istəmirsə, qoy Ağdama getməsin”-bu sözləri Azərbaycan prezidenti İlham Əliyev Münhen Təhlükəsizlik Konfransı çərçivəsində “Ukraynadan əlavə - Avropada həll olunmamış münaqişələr” mövzusundakı paneldə çıxış edərkən deyib.
Prezidentin bu çıxışını Ölkə.az-a danışan politoloq Zərdüşt Əlizadə şərh edib.

"Azərbaycan son 20 ildə elə hey mübaribəyə hazırlaşır. Yəni atəşkəs haqqında müqavilə imzalanandan bəri Azərbaycan və Ermənistan da müharibənin bərpasına hazırlaşırlar. Orduların silahlanması, ehtiyyatda olan əsgərlərin, zabitlərin peşəkarlığı üçün təlimlər keçirilir. Təbliğatda da müharibə ab-havası duyulur. Məsələ ondadır ki,müharibə qərarı nə Azərbaycandan, nə də ki, Ermənistandan asılıdır. Qərarları Moskva verir. Moskva isə münaqişənin qaynar fazaya keçməsinə imkan verməyəcək. İndiki vəziyyətdə nə Azərbaycan, nə də ki, Ermənistan müharibəyə başlaya bilməz".

Qeyd edək ki, panel Sloveniyanın prezidenti Borut Pahorun sədrliyi ilə keçirilib. Müzakirələrdə Xorvatiya baş nazirinin birinci müavini, xarici və Avropa işləri üzrə nazir Vesna Pusiç, Serbiyanın baş naziri Aleksandr Vuçiç, Gürcüstanın baş naziri İrakli Qaribaşvili də iştirak ediblər.

Fatimə İbrahimova
Ölkə.az