Mübariz Əhmədoğlu: "İqtidar-müxalifət görüşündən çox ciddi nəticə gözləyirəm"

"Buna iqtidar müxalifət dialoqunun davamı da demək olar"

Azərbaycanda fəaliyyət göstərən bir sıra müxalifət partiyalarının rəhbərləri növbəti iqtidar-müxalifət görüşünə hazırlaşırlar.

Bir neçə gündən sonra baş tutacaq görüş barədə Ölkə.az-a politoloq Mübariz Əhmədoğlu danışıb. O, bu görüşdən çox şey gözlədiyini bildirib.

"Artıq bu görüş iqtidar müxalifət arasında ilk görüş deyil. Buna iqtidar müxalifət dialoqunun davamı da demək olar. Mən bu dialoqdan kifayət qədər ciddi nəticə gözləyirəm. İqtidar müxalifət dialoqu hər zaman ölkədə sağlam siyasi ab-havanın olması üçün ən vacib, zəruri elementdir. Bu dialoqun başlaması və davam etməsi o deməkdir ki, tərəflərin buna olan münasibəti ciddidir. Əminliklə deyə bilərəm ki, bu dialoqların 4-5-ci hətta 6-cısı da baş tutacaq. Bu görüşdən sağlam nəticələr gözləyirəm"

Qeyd edək ki, İqtidar-müxalifət arasında baş tutacaq görüş fevralın 12-də saat 11.00-da Beynəlxalq Mətbuat Mərkəzində (BMM) keçiriləcək.

Fatimə İbrahimova
Ölkə.az