Millət vəkilləri yeni təyin olunmuş səfirdən danışdılar

"Səfirin gəlişi diqqətli izlənilir və hər bir çıxışı təhlil olunur"

Amerika Birləşmiş Ştatlarının Azərbaycana yeni təyin olunmuş səfiri Robert Sekutanın azərbaycanlılara ünvanladığı videomüraciəti millət vəkillərinin diqqətini çəkib.

Ölkə.az-a danışan millət vəkilləri səfirin hələ Azərbaycana fiziki cəhətdən gəlməmiş videoçarx vasitəsi ilə xalqımıza müraciət etməsini müsbət qarşıladığını bildiriblər.

Fazil Mustafa: "Yeni səfirin fəaliyyətə başlaması Azərbaycan üçün əhəmiyyətli bir hadisədir. Çünki ABŞ kimi bir dövlətin Azərbaycanda fəaliyyətinin hansı istiqamətdə getməsi, Azərbaycanın problemlərinə yanaşma tərzi və başqa məsələləri əhatə etdiyinə görə, Azərbaycan cəmiyyəti bu mövzuda diqqətlidir.

Səfirin gəlişi diqqətli izlənilir və hər bir çıxışı təhlil olunur. Ümid edirəm bu səfirin gəlişi ilə Dağlıq Qarabağ mövqeyinin daha çox dəstəklənməsinin şahidi olacağıq və bu istiqamətdə də səfirin fəaliyyətinin müsbət istiqamətli inkişafını görəcəyik".

Zahid Oruc: "Səfirin videoçarx vasitəsi ilə Azərbaycana fiziki cəhətdən gəlməmiş xalqımıza müraciət etməsini müsbət qarşılayıram. Düşünürəm ki, əgər gələcək səfir bu əməkdaşlığı daha da gücləndirəcək addımlar atacaqsa və öz ölkəsinə daha da operativ, obyektiv məlumatlar çatdırmağa nail olacaqsa, bu yalnız bizdə müsbət reaksiyalar doğuracaqdır. Qısacası, onun bizə göndərdiyi salamı qəbul edirik".

Qeyd edək ki, fevralın 12-də ABŞ-ın Azərbaycana yeni təyin olunmuş səfiri Robert Sekutanın Bakıya gələcəyi və öz diplomatik missiyasına başlayacağı bildirilir.

Səfirin müraciətinin videosunu oxucularımıza təqdim edirik:

Fatimə İbrahimova
Ölkə.az