Soçi görüşündə Əliyevlə Sarkisyan arasında söz atışması olub
Rusiya prezidenti Vladimir Putinin vasitəçiliyi ilə Soçidə baş tutan Azərbaycan, Ermənistan və Rusiya dövlət başçılarının üçlü görüşündə münaqişəli tərəflər Bakı ilə İrəvanın yeni bir Qarabağ savaşı çıxarmama sözü verdiyi bildirilir.
Ölkə.Az Türkiyənin Hürriyət qəzetinə istinadən bildirir ki, Rusiya prezidentinin məşhur "Boçarov Ruçey" iqamətgahında İlham Əliyev ilə Serj Sarkisyanı bir araya gətirən Putin qeyd edib ki, Azərbaycan Prezidenti İlham Əliyevin mövcud problemlərin sadəcə sülh yolu ilə həllə qovuşa biləcəyini qeyd etməsini böyük məmnuniyyətlə qarşılayıram. Həmçinin Ermənistan Prezidenti Serj Sarkisyanın da münaqişənin sülh yolu ilə həlli variantında İlham Əliyevlə həmfikir olmasının çox əhəmiyyətli olduğunu deyən Rusiya dövlət başçısı bunun Sovetlər İttifaqının dağılmasından sonra yaranan Dağlıq Qarabağ probleminin masa başında həllə qovuşdurulması üçün vacib şans hesab etdiyini bəyan edib.
Qarabağ münaqişəsinin həllində çıxış yolu tapıla bilməsi üçün buna sağlam fikir və səbrli hərəkətlə davam etməyin vacibliyini önə çəkən Putin daha sonra əlavə edib: "Qarabağ böhranın çox uzandığının mən də fərqindəyəm. Problemin həlli üçün beynəlxalq miqyasda Avropa Təhlükəsizlik və Əməkdaşlıq Təşkilatının (ATƏT) Minsk qrupu da səylər göstərir. Təbii, biz Rusiya olaraq həm coğrafi baxımdan yaxınlıq, həm də Azərbaycan və Ermənistanla tarixi əlaqələrimizə söykənərək, yeni təşəbbüslər irəli sürməyə çalışacağıq".
“Hürriyət” qəzeti yazıb ki, prezidentlərin budəfəki görüşündə gərginlik də yaşanıb. Belə ki, Əliyevlə Sərkisyan "yeni bir savaş əvəzinə sülh yoluyla həllin tərəfdarıyıq" demələrinə baxmayaraq, aralarında yenə də söz atışması olub.
İlham Əliyev son günlər cəbhədə artan gərginlik və Qarabağ probleminin 20 ildən bəri həll oluna bilməməsindən narahatlığını dilə gətirib və deyib ki, "BMT Təhlükəsizlik Şurası illər öncə işğal altındakı Azərbaycan torpaqlarının erməni silahlı qüvvələri tərəfindən boşaldılmasına dair qətnamələr qəbul edib. Ermənistan BMT Təhlükəsizlik Şurasının bu qətnamələrini hələ də niyə yerinə yetirmir?".
Azərbaycan prezidentinə cavab verən Serj Sərkisyan isə "BMT Təhlükəsizlik Şurasının Qarabağ mövzusunda bir deyil, tam dörd qərarı var. Görəsən Azərbaycan bu qərarlardan hansını yerinə yetirdiyini bizə söyləyə bilərmi?" deyə təəccüb doğuran açıqlama ilə çıxış edib.
Sərkisyanın Azərbaycanın BMT Təhlükəsizlik Şurasının hansı qərarını yerinə yetirməli olduğunu nəzərdə tutması qaranlıq qalıb.
“Hürriyət”in məlumatına görə, üçtərəfli görüşdə Azərbaycan və Ermənistan liderlərinin bir-birini günahlandıran bu açıqlamaları qısamüddətli toplantıda gərginliyin daha da artmasına səbəb olub.
Ancaq Sərkisyan son sözlərində bir qədər yumşaq tərzdə "mən Ermənistan Respublikasının prezidenti olaraq xalqım adına yenə də İlham Əliyevə təşəkkür etmək istəyirəm. Münaqişənin həlli üçün gücdən istifadəyə üstünlük vermək istəmədiklərini söyləməsi hamımız üçün ümidvericidir" deyib.
Soçi görüşünün yekununda Azərbaycan və Ermənistan prezidentləri İlham Əliyevlə Serj Sərkisyan Dağlıq Qarabağ məsələsi üzrə dialoqu davam etdirmək istəyini ifadə ediblər.
