Ekspert: \"Türkiyənin hərbi təcrübəsindən öyrənməli olduğumuz çox şeylər var\"

"Unutmaq olmaz ki, tarixi reallıqların bir sıra avropa və qərb dövlətləri, xüsusilə Ermənistan tərəfindən kobudcasına təhrif edilməsi də adı çəkilən hər iki dövləti bir-birinə doğru addımlamağa vadar edir"

"İstər Türkiyə, istərsə də dünyanın digər böyük dövlətlərilə ilə imzalanan hərbi saziş və memorandumlar qısa zaman kəsiyində ordumuzun təkamül prosesini maksimumumadək gücləndirib. Yəni, ordumuzun beynəlxalq əlaqələr istiqamətində daha da genişlənən coğrafiyası bu gün və gələcəkdə əldə olunacaq uğurların əsas bazası rolunu oynayır. Əlaqələrin genişləndirilməsi dünya miqyasında istər Azərbaycan xalqının və dövlətinin özünüifadəsinə, istərsə də Silahlı Qüvvələrimizin təkamülünə strateji töhfələr verməklə yanaşı, hökumətin də siyasi arenaya daha aydın və konkret notlar üzərində qurulan çıxışına zəmin yaradır".

Bu sözləri Ölkə.az-a danışan hərbi ekspert İbrahim Rüstəmli müdafiə naziri Zakir Həsənov Türkiyə Milli Müdafiə Nazirliyinin Xəritə Baş Komandanını qəbul etməsini şərh edərkən deyib.

"Azərbaycanda Silahlı Qüvvələr quruculuğunun əsas taktiki-strateji elementləri sırasında beynəlxalq əlaqələrə xüsusi önəm verilir və bu, bütün direktiv sənədlərdə öz əksini tapır. Müasir dünya təcrübəsinin öyrənilməsi və qarşılıqlı əlaqələr xidmətə yaradıcı münasibəti stimullaşdıran, inkişaf perspektivlərini müəyyənləşdirən həlledici amillərdir.
Bu sırada qardaş Türkiyə Cümhuriyyətinin özünəməxsus yeri və rolu danılmazdır. Əlbəttə, dil və din yaxınlığı hərbi əlaqələrin etibarlı özüllər üzərində qurulmasına ciddi təkan verir. Ancaq unutmaq olmaz ki, tarixi reallıqların bir sıra avropa və qərb dövlətləri, xüsusilə Ermənistan tərəfindən kobudcasına təhrif edilməsi də adı çəkilən hər iki dövləti bir-birinə doğru addımlamağa vadar edir. O üzdən Azərbaycan, artıq uzun müddətdir dünya birliyinin saxta dəlillərə söykənmiş siyasi təpkisinə qarşı mabarizə aparan Türkiyə Cümhuriyyətinin təcrübəsindən bəhrələnməyə üstünlük verir.

Ordu Quruculuğu sahəsində də vəziyyət o qədər fərqli deyil. Düzdür, Azərbaycan müvafiq yöndə bir sıra məqamlarda Türkiyəni öz inkişaf tempinə görə hətta arxada qoyur, amma bu ölkənin hərbi təcrübəsindən öyrənməli çox şeylər var. Yəni, təcrübə mübadiləsi indiki məqamda ordumuzun mənəvi maraqları çərçivəsindədir və bu, daim yüksək templə inkişaf etdirilir. Nəticə isə göz qabağındadır".

Qeyd edək ki, fevralın 10-da Azərbaycan Respublikasının Müdafiə naziri general-polkovnik Zakir Həsənov Türkiyə Respublikası Milli Müdafiə Nazirliyinin Xəritə Baş Komandanı general-leytenant Burhanettin Aktının rəhbərlik etdiyi nümayəndə heyətini qəbul edib. Görüş zamanı hər iki ölkənin Silahlı Qüvvələrinin inkişafı istiqamətində həyata keçirilən tədbirlər, ikitərəfli hərbi əməkdaşlıq məsələlərinin əhəmiyyəti, regiondakı hərbi-siyasi vəziyyət, Ermənistan-Azərbaycan Dağlıq Qarabağ münaqişəsinin həllinin bölgə üçün vacibliyi müzakirə edilib.

Fatimə İbrahimova
Ölkə.az