Lənkəranda ailəvi zəhərlənmə

Lənkəranda ailəvi zəhərlənmə hadisəsi baş verib. 

Hadisə rayonun Ürgə kəndində qeydə alınıb.Lənkəranın Ürgə kəndində Nəcəfovlar ailəsində şam yeməyindən sonra qəfildən uşaqların səhhəti pisləşib. Vəziyyəti belə görən valideynlər Lənkəran Rayon Təcili və Təxirəsalınmaz Tibbi Yardım Stansiyasına müraciət ediblər. Zəhərlənmiş Elnur, Əkbər, Elnarə və Xanpəri Nəcəfovlar dərhal Lənkəran Mərkəzi Rayon Xəstəxanasının infeksion şöbəsinə yerləşdirilib. 

Xəstəxanaya qaytarma, ürəkbulanma, ishal ilə daxil olan uşaqlara ilkin tibbi yardım göstəriləndən sonra zəhərlənmənin daha ağır fəsadlarla nəticələnməsinin qarşısı alınıb.

Valideynlərin sözlərinə görə, yemək zamanı pomidor turşusundan istifadə ediblər. Ehtimal olunur ki, zəhərlənməyə məhz pomidor turşusu səbəb olub.

Lənkəran MRX-dan  verilən məlumata görə, hazırda vəziyyətləri stabil olan uşaqlardan müvafiq analizlər götürülərək laboratoriya müayinəsinə göndərilib. Zəhərlənmənin dəqiq səbəbi müayinənin nəticəsindən sonra məlum olacaq. (Kəpəz TV)

Ölkə.Az