Angela Merkel: Aİ Rusiyaya qarşı yeni sanksiyaları istisna etmir

Almaniya Kansleri Angela Merkel bildirib ki, Avropa İttifaqı (Aİ) liderləri Avropa Komissiyasından Rusiyaya qarşı tətbiq oluna biləcək əlavə sanksiyalar paketini hazırlamağı xahiş edib.

Almaniya kansleri Brüsseldəki mətbuat konfransında çıxış edərkən Aİ-nin Ukraynanın şərqində atəşkəs rejiminə əməl olunmayacağı təqdirdə Moskvaya qarşı yeni sanksiyaların tətbiq ediləcəyini istisna etmədiyini qeyd edib.

Avropa Şurasının başçısı Donald Tusk Aİ ölkələri liderlərinin sammitinin yekununda, həmçinin Avropa İttifaqının artıq təsdiq olunmuş sanksiyaların vaxtını dəyişməyəcəyini bəyan edib.

Fevralın 12-si səhər saatlarında Almaniya, Fransa, Ukrayna və Rusiya liderlərinin Minskdə Ukraynanın şərqindəki qanlı münaqişənin nizamlanmasına dair 15 saatdan artıq davam edən danışıqların yekununda fevralın 15-dən etibarən atəşin dayandırılması və ağır texnikanın təmas xəttindən geri çəkilməsi barədə razılığa gəliblər.

Keçən həftə Aİ sanksiya siyahısını genişləndirərək daha 19 Rusiya vətəndaşının və Rusiya yönümlü separatçının, həmçinin doqquz hüquqi şəxsin aktivlərini dondurub və onlara qarşı viza məhdudiyyətləri tətbiq edib./Azərtac/

Ölkə.Az