Politoloqlar sevgililər günündən danışdılar

"Ən mənalı ömür sevgi içərisində keçən ömürdür"

Razi Nurullayev: "Öncə deyim ki, 14 fevralı hər zaman qeyd edirəm. Təbii ki, bunun həm də xoş xatirələri var. Amma çox açıb-ağartmaq istəməmişəm heç vaxt. Çünki cəmiyyətdə bu günə skeptik yanaşanlar da az deyil. Sevgi günü özüm üçün də gözəl gündür. Sevgi insanı yaşamağa ruhlandırır. Dahi Nizami demişkən "Eşqdir mehrabı uca göylərin, eşqsiz ey dünya nədir dəyərin". Sevgisiz yaşamaq olarmı məgər? Dünya sevgi üzərində qurulub. Dünyanı Allah belə yaradıb. Sevib-sevilməkdən danışmaq eyib deyil. Həyatın yaranışı budur. Biz sevgimizi bölüşüb yaşayırıq bu dünyada. Hər bir kəs üçün dünya iki olanda vahiddir. Sevgililər ayrılanda dünyalarını bölmüş olurlar. Dostum, qardaşım şair Ramiz Qusarçaylı dili ilə bu çox gözəl ehtifa olunub.

Axşam şəri, səhər danı,
Səninlə böldüm hər anı,
Sonuncu dəfə dünyanı
Yarı böləndə ağlama...

Arastun Oruclu: "Sevgi təbiətin insana verdiyi ən ülvi və ən təmənnasız hisdir. İnsan yaşadıqca sevgi var və sevgi yoxdursa, demək artıq insan da yaşamır. Sevən-sevilənlər üçün həyatın hər günü sevgililər günüdür. Ən mənalı ömür də elə sevgi içərisində keçən ömürdür. Hər kəsə ömrünü ailə sevgisi, övlad sevgisi, valideyn sevgisi, insan sevgisi içində keçirməyi, gənc yaşlarında sevənlərə bu hissi ömrü boyu qoruyub saxlamağı arzulayıram!"

Mubariz Əhmədoğlu: Mən sevgi baxımından Allahın ən xoşbəxt bəndəsiyəm. Gözəl həyat yoldaşım var, 4 balam var mənim. Hər biri də arzuladığım övladlar. Mənim sevgim də məhəbbətim də, hər şeyim evimin içində, ailəmlə bağlıdır. Məncə, bu bayram gənclər üçün daha gözəldir. Hər kəsi bu özəl gün münasibəti ilə təbrik edirəm".

Fatimə İbrahimova
Ölkə.az