Azis Bakıda konsert verəcəkmi?

O vaxt Azis konsert barədə xəbərləri təkzib etmişdi.

Ölkə.Az xəbər verir ki, iyulun 25-i Bakıda Bolqarıstanın ekstravaqant müğənnisi Azisin konserti keçiriləcək. Bu barədə məlumatı tanınmış azərbaycanlı prodüsser Samir Xəttab yayıb.

O, bildirib ki, müqavilə artıq imzalanıb və ulduzun möhtəşəm konserti Xəzər dənizinin sahilində yerləşən istirahət mərkəzlərinin birində baş tutacaq.

Xatırladaq ki, bir il öncə yerli mətbuatda Azisin Bakıda konsert proqramı ilə çıxış edəcəyi haqda xəbərlər yer almışdı.

Lakin Azis şəxsi "Facebook" profilində status yazaraq konsert barədə xəbərləri təkzib etmişdi.

Konsertin budəfəki taleyini öyrənmək üçün Ölkə.Az olaraq elə təşkilatçının özünə, Samir Xəttaba müraciət etdik.

Prodüsser bildirib ki, o, bu dəfə Azislə şəxsən görüşərək razılığa gəlib.

"Bəli,ilk dəfə də onun gəlməsi ilə bağlı xəbəri mən yaymışdım, sadəcə, arada vasitəşi şirkətlər üzündən aramızda qalmaqal yaşandı. Hətta bolqar qəzetlərində belə adım hallandı. Gəlməmə ehtimalı olsaydı, özü, hər halda Bakıya gələcəyi ilə bağlı xəbəri paylaşmazdı. İmice gəldikdə, o, səhnəyə o imicdə cıxmırdı onsuz da. Bura da o vaxt gəlsəydi, normal imicdə cıxacaqdı. Sadəcə olaraq bu dəfə Azislə birbaşa üz-üzə görüşdük və razılaşdıq", - deyə Samir Xəttab qeyd edib.

Qeyd edək ki, əsl adı Vasil Troyanov-Boyanov olan Azis pop-folk janrında oxuyur. O, musiqi karyerasına 1999-cu ildən başlayıb. Azis biseksualdır və bunu gizlətmir. Müğənni 2006-cı il oktyabrın 1-də oğlan sevgilisi Niki Kitaetslə qeyri-rəsmi nikaha girib. Bolqar ulduzun 2007-ci ildə keçmiş rəfiqəsi folk müğənni Qaladan Raya adlı qızı doğulub.

Rəşid Mustafazadə

Ölkə.Az