Qaxda canavarlar kəndə hücum çəkdi

Qaxda canavarların kəndə hücumu ilə bağlı xəbər sakinlərin təşvişinə səbəb olub.

Gecə saatlarında rayonun Şotavar kəndində yırtıcılar kənd sakininə məxsus atı parçalayıblar. Hadisə kəndin içində baş verib. Şotavar kəndində hücum çəkən canavarlar sakinlərə böyük qorxu yaşadıb. Yırtıcılar kənd sakini Yaşar İbrahimova məxsus bir baş at balasını parçalayıb.

Təhlükəni hiss edən heyvan kəndiri qırıb qaçmağa müvəffəq olsa da, uzağa gedə bilməyib. Sakinlər son zamanlar oxşar hadisələrin tez-tez baş verdiyini deyirlər. Onların sözlərinə görə, azğınlaşan canavarlar əsasən gecə vaxtı kəndə soxulur və təsərrüfatlara ziyan vururlar. 

Yem dalınca yaşayış məskənlərinə gələn yırtıcıların insanların həyatı üçün təhlükə yaratdığını deyən sakinlər müvafiq tədbirlərin görülməsini gözləyirlər. (Region TV)

Ölkə.az