Şəmkirdə bir ev həftə ərzində iki dəfə yanıb

Şəmkirdə bir ev həftə ərzində iki dəfə yanıb

Şəmkirdə bir mənzildə 7 gün ərzində iki dəfə yanğın hadisəsi baş verib. İlk yanğının fəsadları ciddi olmasa da ikinci hadisə zamanı ev əşyaları ilə birlikdə yanaraq külə dönüb. İlk hadisədən sonra evə qaz və işıq verilişi dayandırıldığı halda yanğının hansı səbəbdən baş verdiyi naməlum olaraq qalır.

Şəmkir rayonunun Dəllər qəsəbəsində Sehran Quliyevaya məxsus fərdi yaşayış evində bir həftə ərzində iki yanğın qeydə alınıb. Fevralın 9-u axşam saatlarında sözügedən ünvanda baş verən yanğın zamanı evin zirzəmisində 3 kvadrat metr sahə və ev əşyaları yanıb. Həmin vaxt hadisə yerinə cəlb olunan yanğınsöndürmə briqadaları alovun qısa zamanda ətraf ərazilərə yayılmasının qarşısını ala bilib.

Sehran Quliyeva - zərərçəkən: "Bir həftə bundan öncə birdə gördük ki, zirzəmidən tüstü çıxır. Tez aşağı düşdük. Yanğınsöndürənlər çağırıldı. Tez bir zamanda keçirdilər. Onda da yandı, amma bu qədər yox".

Bundan sonra aidiyyatı strukturlar tərəfindən mənzilə işıq və qaz verilişi dayandırılıb. Amma 7 gün sonra evdə yenidən yanğın hadisəsi qeydə alınıb. Bu dəfə alov o qədər güclü olub ki, qısa zamanda taxta konsturksiyalı əşyalar yararsız hala düşüb. Əraziyə çağırılan 3 yanğınsöndürmə briqadası yardımçı tikllini və zirzəmini alovdan mühafizə edə bilib.

Sehran Quliyeva - zərərçəkən: "Bir də dünən evdə oturmuşduq. Qonşu gəldi ki, sizin arxa otaq yanır. Keçdik arxaya gördük alov bürüyüb. Bütün evimiz, əşyalarımız təmiz yandı".

Fövqəladə Hallar Nazirliyinin əməkdaşları yanğının baş vermə səbəblərini araşdırmaq üçün sözügedən ünvanda zəruri istintaq hərəkətlərinə başlayıblar. (Region TV)

Ölkə.az