Ekspert: \"Əhalinin artım dinamikası vətəndaşlara iş yeri tapmaqda çətinlik yaradır\"

"Əhalinin artım yüksəkliyi səbəbi ilə iş yerləri çatmır. İxtisaslı fəhlə hazırlığı ölkə ərazisində heç də yaxşı səviyyədə deyil. Bu baxımdan hətta iş yerləri olsa belə, bəzən mütəxəssis tapmaq çətin olur".

Bu sözləri Ölkə.az-a danışan Əmək Hüquqları üzrə ekspert Sahib Məmmədov deyib.

"Bizdə əhalinin artım dinamikası ilə iş yerlərinin artım dinamikası arasında fərq var. Doğuşun göstəriciləri yüksək olaraq qalır. Yəni bizdə əmək bazarına işçi qüvvəsi daha çox daxil olur, bu isə Avropa ilə müqayisəolunmazdır. Səbəb əlbəttə ki, bu demoqrafik şəraitdir. Əhalinin artım yüksəkliyi səbəbi ilə iş yerləri də çatmır.

İkinci təhsillə bağlı problemdir. İxtisaslı fəhlə hazırlığı ölkə ərazisində heç də yaxşı səviyyədə deyil. Bu baxımdan hətta iş yerləri olsa belə, bəzən mütəxəssis tapmaq çətin olur. Digər səbəb əhalinin qeyri-bərabər paylanmasıdır. Buna görə də, regionlarda aqrar sektoru, əmək haqlarını artırmaq mümkün olmur. Gərək bu qeyri-bərabərlik öz həllini tapsın".

Qeyd edək ki, Azərbaycanda məşğulluq xidməti orqanları tərəfindən ölkə üzrə rəsmi işsiz statusu verilmiş şəxslərin fevralın 1-nə qədər olan sayı 28,9 min nəfər olub və onların 39,4 faizini qadınlar təşkil edib.

Fatimə İbrahimova
Ölkə.az