Şöhrət haqqında bir iki söz

 

Sovet donemində yaşayanların yaxşı yadında olar. O vaxtlar nədənsə orta məktəblərdə “a” sinifləri “b” siniflərindən güclü olurdu. Mənim də taleyimə birinci sinifə gederkən “b” sinfində oxumaq duşmüşdü. 1”b” sinfinin şagirdi olmuşdum. Iki il təhsil aldıqdan sonra sinfin əlaçısı oldum.

Amma etiraf edim ki, əlacı oldugum sinfin müvəffəqiyyət faizi elə də yuxarı deyildi. Zəiflər arasında əlaçı olmaq elə də hünər tələb etmirdi. Valideynlərim bunu hiss edib 3-cü sinifdə məni “a” sinfinə keçirtdilər. Və onda...... Onda rəqabətin necə güclü oldugunu anladım və əlacı olmaq ucun sözün əsil mənasında çalışmaq, oxumaq, necə deyərlər mübarizə aparmaq lazım oldu. Təbii ki, oxudum və əlaçılığımı qoruyub saxladım. Etiraf edim ki, “a” sinfindəki əlaçılığım daha möhkəm idi. Axi 36 nəfərlik sinfin icində 25-liyin sırasında olmaq elə də asan deyildi. “b” sinfində təsil alanda isə kafi qiymətlərlə oxuyanların arasında yeganə əlacı idim. İndi özünüz müqayisə edin.

Bütün bunları söyləməkdə məqsədim heç də sizi keçmişə ekskurs etdirmək deyil. Esas məqsədim başqadır. Son dövrlər ətrafımda baş verənlər bunları xatırlamaga sövq etdi məni. Nədənsə gənclərimizin bəziləri zəiflər arasında güclü olmaga üstünlük verirlər. Savadsızlar arasında savadlı olmaları ilə fəxr edirlər. Səviyyəsizlərin yanında səviyyəli, qeyripeşəkarların dairəsində peşəkar, eybəcərlərin gözəli olmağı fəxarət hissi verir bəzi gənclərimizə. Təbii ki bu xüsusiyyət də onlara ucuz şöhrət gətirir. Ömürü az olan bir başgicəllənmə.

Şöhrət nədir? Azərbaycan dilinin izahlı lügətində bu sözün açıqlaması aşağıdakı kimi verilib:

1.Zəhmət, xidmət, istedad, məharət və s. nəticəsində hamı tərəfindən tanınma; məşhur olma, şərəfli ad qazanma, məşhurluq, ad-san.
2.Şöhrətbazlıq, şöhrət düşkünlüyü.
3.Şan, şərəf, iftixar.

Əslində insanın yaşaması və özünü təsdiq etməsi üçün vacib olan bir amildi. Amma şöhrətbazlıq, şöhrət düşkünlüyü heç də başucalığı gətirən bir məqam deyil. Ümumiyyətlə, hər hansı bir işin təməlində zəhmət durarsa, şöhrət də, şərəf də artiq təmin olunur.

Sözüm gənclərimizədir:

-Zəhmətinizin, istedadınızın, məharətinizin sayəsində tanınanlardan olun, ad-sana sahib olun. İmzaniz olsun imzalar icərisində. Amma şöhrətpərəst olmuyun, ucuz ad-sanın dalınca getməyin. Dahi Nizami Gəncəvi bu haqqında çox gözəl demişdi.

İlantək dikbaşlı gəzmə, ey insan!
Aşacaq dünyanın seli başından.
Yeddi başın olsa əjdahalartək,
Onun yeddisi də yerə düşəcək.
Çox da yüksəkliyə ucalma ki, sən
Torpağa düşəndə inciməyəsən.
Nə qədər alçaqdan yıxılsa adam,
O qədər ağrısı az olar müdam.

Sevinc Əliyeva

Ölkə.Az