“Muğam televiziya müsabiqəsi” yenidən sənətsevərləri öz sehrinə saldı

Beynəlxalq Muğam Mərkəzində Heydər Əliyev Fondunun dəstəyi, Azərbaycan Mədəniyyət Fondunun layihəsi əsasında, Azərbaycan Televiziyasının təşkilatçılığı, Mədəniyyət və Turizm Nazirliyinin iştirakı ilə reallaşan beşinci “Muğam televiziya müsabiqəsi” öz rəngarəngliyi ilə davam edir.

Növbəti muğam axşamında da sənətsevərlər gənc xanəndələrin maraqlı ifalarını dinləmək imkanı əldə ediblər. Belə ki, gənc ifaçılar peşəkar münsiflər heyətinin və milyonlarla tamaşaçının qarşısına çıxaraq muğam və təsniflərimizi özməxsus şəkildə ifa ediblər.

Onları xalq artistləri Əlibaba Məmmədov, Arif Babayev, Səkinə İsmayılova, Mənsum İbrahimov, Ramiz Quliyev, əməkdar incəsənət xadimləri Sərdar Fərəcov və Nadir Axundov daxil olduğu münsiflər heyəti qiymətləndirib.

Həyəcan və rəqabətin artdığı yarışmada gənc ifaçılar peşəkar münsiflər heyətinin irad və tövsiyyələrinə hər zaman olduğu kimi, bu dəfə də diqqətlə yanaşıblar. Hər bir ifaçı münsiflər heyəti tərəfindən layiqli qiymətini alıb.

Qeyd edək ki, bu gənclər müxtəlif rayon və şəhərlərdə aparılan dinləmələrdə seçilən istedad sahibləridir.

“Muğam televiziya müsabiqəsi” artıq nəinki ölkəmizdə, o cümlədən xaricdə də böyük maraqla izlənilir. Gündən-günə tamaşaçı auditoriyası genişlənən müsabiqə həftənin bazar ertəsi və cümə günləri muğamsevərlərin görüşünə gəlir.

Yarışmanın şərtlərinə görə münsiflər heyəti tərəfindən verilən ballar toplanılır və ən az səs toplamış iştirakçı müsabiqəni tərk edir. Müsabiqə yeni başladığından yarışmaya qatılan və ən az bal toplayan ifaçılar növbəti həftədə yenidən çıxış etmək imkanı qazanıblar. Münsiflər onlara özlərini sınamaq və təsdiqləmək üçün şans verib.

Tamaşaçı alqışı və həyəcan dolu anlarla müşayiət olunan beşinci “Muğam televiziya müsabiqəsi” konsertləri AzTV və “Mədəniyyət” kanalı vasitəsilə canlı yayımlanır./Azərtac/

Ölkə.Az