Xocalı faciəsi Meksika mətbuatında
Azərbaycanın Meksika Birləşmiş Ştatlarındakı səfirliyinin mətbuat xidmətindən Ölkə.Az-a verilən məlumata görə, Meksikanın “www.sinembargo.mx”, “www.enterlineas.com.mx” xəbər saytlarında Meksika Konqresinin Deputatlar Palatasında keçirilmiş “İnsan Oğurluğu və Soyqırım Əleyhinə Beynəlxalq Gündəm, Xocalıda Soyqırım Hadisəsi Konfransı”na həsr olunmuş məqalələr yayımlanıb.
Meksikanın www.sinembargo.mx xəbər saytında yayımlanmış “Qanunvericilər və diplomatlar insan oğurluğu əleyhinə çağırışları təhlil etdilər” və www.enterlineas.com.mx xəbər saytında “Ayotzinapa və Tlatlayada yenilənmiş soyqırım məsələsi” sərlövhəli məqalələrdə hazırda ölkə gündəmində olan insan oğurluğu və soyqırıma qarşı mübarizə məsələləri kontekstində Xocalı soyqırımına dair Meksika Konqresinin Deputatlar Palatası tərəfindən keçirilmiş konfransın əhəmiyyəti vurğulanıb.
Məqalələrdə həmçinin Konqresin Deputatlar Paltasının üzvü, Palatanın İdarə Şurasının katibi xanım Maqdalena del Sokorro Nunyezin konfransda səsləndirdiyi fikirlərə istinadən Meksikada müvafiq olaraq 43 nəfərin oğurlanması və 22 nəfərin güllələnməsi ilə nəticələnən “Ayotzinapa və Tlatlaya” hadisələrinin “Meksikada insan ləyaqətinin alçalmasına səbəb olduğu” qeyd edilərək, Meksika cəmiyyətinin ölkədə cinayətə, habelə yerli və federal səviyyələrdə insan hüquqlarının qorunması məsələsinə reaksiyasını artırmalı olduğu diqqətə çatdırılıb. Bu kontekstdə Meksika Konqresində Xocalı soyqırımına həsr edilən konfransın dünyada soyqırım və digər insanlıq əleyhinə cinayət hadisələrinin analizi baxımından əhmiyyəti vurğulanıb. Xanım deputat qeyd etmişdir ki, “insan ləyaqəti prinsipi qanunvericiləri insan oğurluğu və soyqırım kimi qəddar davranışlara qarşı birləşdirməlidir”.
Xanım Sokorro Nunyez, insan oğurluğu və soyqırıma qarşı mübarizə məsələlərinin Konqresin gündəliyində həllini gözləyən əsas mövzulardan biri olduğunu bildirib. Daha sonra məqalələrdə konfransın koordinatoru, Meksika Sülh, Ədalət və Ətraf Mühit Birgə Fondunun Baş katibi Alfredo Roxasa istinadən, tədbirin əsas məqsədinin insan oğurluğu və soyqırım cinayətləri barədə yeni nəslin məlumatlandırılması, belə halların qarşısının alınması üçün müvafiq maarifləndirmə işinin aparılmasından ibarət olduğu bildirilib.
Həmçinin məqalələrdə Azərbaycanın Meksikadakı Səfiri İlqar Muxtarovun konfransda səsləndirdiyi fikirlərə istinad edilərək, Ermənistanın Azərbaycana qarşı təcavüzkar siyasəti, Xocalı soyqırımının təfərrüatları və münaqişəyə dair BMT TŞ-nin məlum qətnamələri barədə məlumat verilib, habelə konfransda çıxış edən digər iştirakçıların fikirləri yer alıb.
Ölkə.Az
