\"Paşinyanın bu çıxışından sonra heç imitasiya xarakterli danışıqlar aparmaq üçün də yer qalmadı”

Bunu “Ölkə.Az”a açıqlamasında Azərbaycanın sabiq xarici işlər naziri Tofiq Zülfüqarov Nikol Paşinyanın  avqustun 5-də Xankəndində “Qarabağ artıq Ermənistandır" bəynatını şərh edərkən deyib.

Onun sözlərinə görə, əgər Ermənistanın danışıqlar prosesində    indiyədək iştirakı  imitasiya xarakteri daşıyırdısa, artıq bu da iflasa uğradı. “İndiyədək Rusiyanın, ələxüsus da Lavrovun təşəbbüsü ilə danışıqlar prosesi həyata keçirilirdi ki, guya münaqişənin həllinda real perspektivlər mövcuddur, bu gün-sabah 5 rayon qaytarılacaq və sair.  Artıq Paşinyanın sonuncu bəyanatından sonra həmin məsələlər də öz əhəmiyyətini itirdi. Heç imitasiya xarakterli danışıqlar aparmaq üçün də yer qalmadı”- T.Zülfüqarov deyib.

Sabiq nazir bildirib ki, Paşinyanın Xankəndində verdiyi bəyanat  alternativsiz olaraq Ermənistanı Azərbaycanla birbaşa genişmiqyaslı hərbi əməliyyatlara sürükləyir. “Paşinyanın ölkəsini Azərbaycanla genişmiqyaslı hərbi əməliyyatlara sürükləməsinin əsas məqsədi  Ermənistanı Rusiyanın təsir dairəsindən uzaqlaşdıraraq Qərbmeyilli siyasət aparmağa nail olmaqdır. Hərbi əməliyyatların uğurlu, uğursuz olub-olmamasından asılı olmayaraq, onlar bu məsələdə Rusiyanı ittiham edəcək. Deyəcəklər ki, bizim təhlükəsizliyimizə təminat vermədiniz və sair. Ona görə də  biz Rusiyadan üz döndərib qərbə doğru üz tuturuq. Burada ikinci digər məqam isə Ermənistan daxilində Paşinyana əsas  rəqib olan müxalif, Rusiyaya meylli siyasi qüvvələrdir. Paşinyan bu yolla onları da zərərsizləşdirmək istəyir. Paşinyanın bəyanatı onu göstərir ki,  o erməni cəmiyyətini  bu ssenariyə hazırlayır və buna zəmin yaradır”- sabiq nazir bildirib.

T.Zülfüqarov hesab edir ki, belə olan halda Azərbaycan müdafiə qabiliyyətini daha da gücləndirməlidir və dövlətimiz öz siyasətini bu istiqamətə qurub: “Artıq Azərbaycan bu istiqamətdə ciddi addımlar atıb. İkincisi, xarici təhlükəsizlik məsələsi ilə bağlı təminat əldə etməlidir. Bildiyimiz kimi Rusiya bu gün təkcə Ermənistan üzərində deyil, hətta Azərbaycanın işğal olunmuş ərazilərində ermənilərin təhlükəsizlik təminatına məsul idi. İndi bu təhlükəsizlik təminatı aradan götürülməkdədir. Azərbaycan öz xarici siyasətini bu formada  aparmalıdır ki, Rusiyadan verilən təhlükəsizlik təminatları bizə mane olmasın. Bu iki istiqamətdə də addımlar atılmaqdadır”.

Sabiq nazirin fikrincə, Azərbaycan öz təbliğatını elə qurmalıdır ki, Paşinyan özü hərbi əməliyyatlarda maraqlıdır və beynəlxalq aləmə bu mesajı çatdırmalıyıq. 

Mürtəza
Ölkə.Az