Mətn ölçüsü:
  • 100%

Güclü qar Neftçalaya 3 milyon manatdan çox ziyan vurub

İki gün fasiləsiz yağan qar Neftçala əhalisini ciddi sınaqlar qarşısında qoyub. Yaşayış evlərinə və inzibati binalara ciddi ziyan dəyib. Qarın yaratdığı fəsadlar nəticəsində rayonun bütün yaşayış məntəqələri artıq 4 gündür ki, elektrik enerjisinə həsrət qalıb. Güclü qarın yağması Neftçala şəhərində, eləcə də bütün yaşayış məntəqələrində ciddi fəsadlara yol açıb.

Rayonun Dördlər kəndində şadlıq sarayı qarın ağırlığına tab gətirməyib və uçaraq tamamilə dağılıb. Xıllı qəsəbəsində məktəb binası, uşaq bağçası, həmçinin bir sıra fərdi yaşayış evinin dam örtüyü çöküb. Rayonda onlarla çoxillik həmişəyaşıl ağaclar kökündən qoparaq aşıb. Şəhər poliklinikasının dam örtüyü sıradan çıxıb. Qar suları şəhərin mərkəzi küçələrini keçilməz edib, istər piyadaların, istərsə də nəqliyyat vasitələrinin hərəkəti çətinləşib. Güclü qar daha çox elektrik təsərrüfatına ciddi ziyan vurub. Rayonda uzun illərdir yenilənməyə ehtiyacı olan elektrik dirəkləri aşdığından, naqillər qırılaraq yerə düşüb. Nəticədə nəinki bütün yaşayış məntəqələri, hətta şəhərin mərkəzi də elektrik enerjisindən məhrum olub.

Rayon Fövqəladə Hallar Komissiyasından verilən məlumata görə, ümumilikdə təbii fəlakət nəticəsində rayon ərazisində 800-ə yaxın talvar çökərək sıradan çıxıb. 112 ədəd avtomobil talvarların altında qalaraq ciddi zədələnib. 80 fərdi yaşayış evi, 4 şadlıq sarayı, 7 yaşayış binasının dam örtüyü çökdüyündən yararsız vəziyyətə düşüb. İlkin araşdırmalara görə, təbii fəlakət nəticəsində rayona 3 milyon manatdan çox maddi ziyan dəyib. (Region TV/CTV)

Ölkə.Az