Mətn ölçüsü:
  • 100%

Politoloq: "Ceyms Uorliki ciddi qəbul etmək lazım deyil"

"Ya onun vəziyyətdən xəbəri yoxdur, ya da sadəcə olaraq öz barışdırıcı rolunu bu cür başa düşür"

"Azərbaycan xalqı unutqan xalq deyil. Biz onsuz da bir sıra məsələlərdə unutqanlıq nümayiş etdirmişik".

Bu sözləri Ölkə.az-a danışan politoloq Fikrət Sadıqov ATƏT-in Minsk qrupunun amerikalı həmsədri Ceyms Uorlikin tvitini şərh edərkən deyib.

"Amerikalı həmsədr dəfələrlə uyğunsuz, qeyri-adekvat ifadələr işlədir. Ya onun vəziyyətdən xəbəri yoxdur, ya da sadəcə olaraq öz barışdırıcı rolunu bu cür başa düşür. Bu təbii ki, səhv yoldur. Çünki söhbət kompromislərdən gedirsə, demək Ermənistana müəyyən təzyiqlər göstərilməlidir.

Bəs indi Ceyms Uorlik bizə nə təklif edir?

Dinc vətəndaşlara qarşı soyqırım törədən ölkəyə dost, qardaş gözü ilə baxaq?!

Bu absurd bir bəyanatdır və bunu ciddi qəbul etmək də lazım deyil. Təəssüflər olsun ki, biz bunu böyük bir dövlətin nümayəndəsinin ağzından eşidirik".

Qeyd edək ki, ATƏT-in Minsk qrupunun amerikalı həmsədri Ceyms Uorlik Xocalı soyqırımının ildönümü ilə bağlı tvitində tərəfləri barışığa çağırıb.

Fatimə İbrahimova
Ölkə.az