BDU tələbələri Xocalı faciəsi qurbanlarını yad etdi

26 fevral tarixində Bakı Dövlət Universiteti Tələbə Həmkarlar İttifaqı Komitəsinin (THİK) təşkilatçılığı ilə Xocalı faciəsinə həsr olunmuş tədbir keçirilib.

Universitetin Tətbiqi riyaziyyat fakültəsi üzrə Həmkarlat Təşkilatının təşkil etdiyi tədbirdə THİK sədri Daşqın Qənbərov, Tətbiqi riyaziyyat fakültəsi THT sədri Emil vəliyev, Jurnalistika fakültəsi THT sədri Azərpaşa Hüseynli, şair-publisist, Xocalı hadisələrinin şahidi German Hüseynov, Elnur Quliyev, “Türk dünyası” qəzetinin baş redaktoru Aybəniz Qafarova, "Əsgər Anaları" Şurasının sədri Leyla Gərayzadə, muğam ifaçısı Rövşən Əziz və tələbələr iştirak edib. Hər kəsi salamlayan Daşqın Qənbərov hər kəsi salamlayaraq Xocalı faciəsinin müstəqil Azərbaycan tarixindəki rolundan və bu gün gənclərin bu cür faciələri unutmamasının zəruriliyini vurğulayıb.

“Bu gün çox kədərli gündür, ancaq sevindirici haldır ki, bugünkü tədbirin keçirilməsində əsas təşəbüskarlar məhz gənclər, bizim tələbələrimizdir. Demək, artıq gənclər müstəqil şəkildə Azərbaycanın başına gətirilən bəlaların tanıdılmasına maraqlıdırlar. Onlara yuxarıdan göstəriş vermək lazım deyil. Azərbaycanın gələcəkdə Xocalı faciəsi kimi cinayətlərlə üzləşməməsi üçün xalqımız birlik nümayiş etdirməli və tezliklə düşmənə öz gücünü göstərməlidir”, - deyə komitə sədri bildirib.

Tətbiqi riyaziyyat fakültəsinin THT sədri Emil Vəliyev Xocalı faciəsi qurbanlarının anılmasını özünə mənəvi borc hesab etdiyini bildirib. Tədbir iştiraçıları Xocalı faciəsi barədə xatirə və fikirlərini tələbələrlə bölüşüb.

Jurnalistika fakültəsi üzrə THT sədri Azərpaşa Hüseynli çıxışında ümumilli lider Heydər Əliyevin ilk dəfə olaraq Xocalı faciəsinə hüquqi-siyasi qiymət verdiyini diqqətə çatdırıb.

“Xalqımızın ümummilli lideri Heydər Əliyevin hakimiyyətə geri dönməsindən sonra bu qanlı faciəyə ilk dəfə olaraq hüquqi-siyasi qiymət verilmişdir. 1994-cü ildə ulu öndər Heydər Əliyevin təşəbbüsü ilə Azərbaycan parlamenti 26 fevralı Xocalı soyqırımı günü kimi qəbul etmişdi”, - deyə Hüseynli bildirib.

Tədbir iştirakçıları Xocalı qurbanlarının xatirəsini bir dəqiqəlik sükutla yad edib. Sonda muğam ifaçısı Rövşən Əziz musiqi nömrəsi ilə çıxış edib.

Sonda THİK fəalları BDU-nun həyətindəki Şəhidlər abidəsinin qarşısına gül qoyaraq, şəhidlərin xatirəsinə ehtiramlarını bildirib.

Qeyd edək ki, tədbirn təşkil olunmasında BDU Tətbiqi riyaziyyat fakültəsi THT üzvləri Zamiq Quluzadə, Emil Vəliyev, Leyla Gərayzadə, Nigar Həsənli, Günay Əhmədova,Nərmin Abdinova,Rüstəm Hümbətzadə fəal iştirak edib.