Politoloq: "Rusiya qiyməti endirməklə Türkiyəyə elə də böyük hədiyyə etməyib"

"Azərbaycanın Türkiyəyə satdığı qazın həcmi ilə, Rusiyanın Türkiyəyə satdığı qazın həcmi eyni deyil"

"Azərbaycan onsuz da Türkiyəyə qazı ümumi bazar qiymətindən ucuz verirdi. Hər şey Rusiyanın satdığı qazın Türkiyə iqtisadiyyatına nə dərəcədə təsir etməsindən asılıdır".

Bu sözləri Ölkə.az-a danışan politoloq Ərəstun Oruclu Rusiyanın Türkiyəyə satdığı qazın qiymətini aşağı saldığını şərh edərkən deyib.

"Bu qiymət endirimi Azərbaycanın Türkiyəyə satdığı qazın qiymətlərindən aşağı olmayacaq. Əgər olarsa, o zaman yəqin ki, bunun Azərbaycana da təsiri olacaq.

Burada həcm məsələsi də var. Azərbaycanın Türkiyəyə satdığı qazın həcmi ilə, Rusiyanın Türkiyəyə satdığı qazın həcmi eyni deyil. Ona görə də bu qiymətlərin Azərbaycana təsir edəcəyini düşünmürəm.

Belə götürəndə Rusiya qiyməti endirməklə Türkiyəyə elə də böyük hədiyyə etməyib. Çünki qazın qiyməti neftlə əlaqəli prosesdir. Bu isə bütün dünyada baş verən hadisədir".

Xatırladırıq ki, Rusiya keçən ilin dekabr ayında Transqaradəniz boru xəttinin tikintisindən imtina edərək "Mavi axın" vasitəsi ilə qazını Türkiyəyə vermək haqqında qərar qəbul etmişdi. Avropa İttifaqını qeyri-ciddilikdə ittiham edən Moskva Ankaraya qazın qiymətlərində güzəştə gedəcəyini vəd etmişdi. İlkin razılığa görə Rusiya qazın qiymətlərini 6% aşağı endirəcəyini bəyan etsə də, hazırda artıq güzəşt faizlərini 10%-dən də aşağı salıb.

Fatimə İbrahimova
Ölkə.az