Mətn ölçüsü:
  • 100%

Beynəlxalq Avropa Hərəkatı yenilənir

Ramin Hacılı: “Məqsədimiz rəhbərlikdə təmsil olunmaqdı”.

Azərbaycan Avropa Hərəkatı bu günlərdə növbəti Konqresini keçirdi. Yeni rəhbərlik seçildi. Bu barədə məlumat vermişdik. Eyni zamanda Beynəlxalq Avropa Hərəkatında da seçkilər olub. İtaliyanın Roma şəhərində keçirilən Beynəlxalq Avropa Hərəkatının (BAH) Federal Assambleyasında İdarə Heyətinin üzvləri, prezidenti, vitse prezidentləri, katibliyin əməkdaşları, assosiativ üzvlər və ölkələr üzrə təmsilçilər qatılıb. Prezident və Xəzinədar vəzifəsinə yenidən müvafiq olaraq Co Laynen və Dris Kallens seçilib. Vitse prezidentlər Jan Mariya Cavada (Fransa); Bernd Hüteman (Almaniya); Nataşa Ovens (Xorvatiya): Uqo Ferruta (İtaliya); Yeva Paunova (Bolqarıstan); Friderik Valler (Belçika) seçilib.İdarə Heyətinə isə Jan Mariya Baupuy (Fransa); Maya Bobiç (Serbiya); Noel Klehan (Belçika); Daniel Korrea (İspaniya); Olivier Hinnekens (Belçika); Kristof Sebastian Klitz (Almaniya); Aleksandra Kluicezka (İtaliya); Roseliyne Lefrançois (Fransa); Kladiya Mutin (İtaliya); Federika Sabati (Almaniya); Kateja Tuoko (Finladiya); Kristian Venning (Almaniya) seçilib.

Federal Assambleyasında həmçinin bir sıra mühüm qətnamələr qəbul edilib.

Eyni zamanda beynəlxalq qurumun baş katibi, Azərbaycanda da bir neçə dəfə səfərdə olmuş Dieqo Pintonun fəaliyyət dövrü başa çatıb. Hazırda o təhvil təslim işləri aparır və bu ilin martında vəzifəsindən gedəcək.

Xatırladaq ki, BAH-ın Azərbaycanda da nümayəndəliyi fəaliyyət göstərir. 41 Avropa ölkəsi arasında ən aktiv nümayəndəliklər sırasında olan Azərbaycan Avropa Hərəkatının prezidenti Ramin Hacılı gələcəkdə BAH-ın idarəçi orqanlarında təmsil olunmaqla bağlı planlarından danışıb: “Biz 2015-ci ili “Avropanın parçası: Azərbaycan” layihəsi etməyi planlaşdırırıq. Bu imkan verəcək ki, Avropa dövlətlərində özümüzə çox sayda müttəfiq tapaq. Düzdü, bu layihənin məqsədlərindən biridi və sizin sualınıza cavabdı. Əsas məqsədimiz isə Avropada Azərbaycanla bağlı təsəvvürü müsbət yöndə inkişaf etdirməkdir. Mən hazırda bilmirəm yeni baş katib kim olacaq, lakin əminəm ki, onunla da

dostluq münasibətləri qura biləcəyik. Hədəfimiz 2016-cı ildən Beynəlxalq Avropa Hərəkatının idarəçiliyində təmsil olunmaqdır. Bunun üçün strateji planımız var, hədəfimizi açıq bəyan etmişik və bu istiqamətdə çalışmalarımızı sürətləndirmişik.”.

Ölkə.az