Millət vəkili: "PKK-nın başında duran şəxslərin bu təklifi qəbul edəcəyi inandırıcı deyil"
"PKK-çıların bu addıma müsbət yanaşacağını gözləmək bir az inandırıcı gəlmir"
"Hər iki tərəfdən müəyyən addımlar atılsa, Türkiyədə siyasi bir dəyişim olar. Əgər atəşkəs elan edə bilsələr, biz müsbət bir tarixi hadisənin şahidi olarıq. Bütün hallarda istəyərdim ki, bu problem dinc yolla öz həllini tapsın. Gərək Türkiyədə vahid dövlət şəkli dəyişmədən kürdlərin də hüququnu müəyyən dərəcədə tanıyan, hamının bərabər hüquqlu bir vətəndaş olduğu cəmiyyət quruculuğuna keçid baş versin".
Bu sözləri Ölkə.az-a danışan millət vəkili Fazil Mustafa Abdullah Öcalanın fikirlərini şərh edərkən deyib.
"Öcalan ola bilər ki, fikirləşsin ki, bu yaxşı addımdır. Amma silah əlində olan digər şəxslərin, yəni PKK-çıların bu addıma müsbət yanaşacağını gözləmək bir az inandırıcı gəlmir. Çünki onların mövcudluğu silahla bir yerdə qəbul olunur. Onlar özlərinin nüfuzunu bu cür təstiqləyiblər. Birdən birə onların statusunun dəyişdirilməsi onlar üçün nə dərəcədə uyğun olması düşündürücüdür. Ola bilsin Öcalan səmimi şəkildə bunu edir, amma PKK-nın başında duran şəxslərin bu təklifi qəbul edəcəyi inandırıcı deyil. Mən atəşkəsi real sanmıram".
Qeyd edək ki, Kürdüstan Fəhlə Partiyasının (PKK) keçmiş lideri Abdullah Öcalan kürd yaraqlılarını hərbi əməliyyatları dayandırmağa və Türkiyədən çəkilməyə çağırıb.
Fatimə İbrahimova
Ölkə.az
