Ekspert: "Medianın inkişaf etməsi üçün rəqabət və azadlığı artırmaq lazımdır"

Milli Televiziya və Radio Şurasının (MTRŞ) sədri Nuşirəvan Məhərrəmli telekanallara xəbərdalıq edib. Nuşirəvan Məhərrəmli telekanalların hal hazırki vəziyyətini reklam bazarı ilə əlaqələndirib.

Telekanalların hansı vəziyyətdə olmasını və inkişaf etməməsinin səbəblərini media eksperti Zeynal Məmmədli Ölkə.Az-a açıqlayıb.

Zeynal Məmmədli: "Medianın inkişaf etməsi üçün yarış və azadlığı artırmaq lazımdır. Bu dünyada hər kəsə məlum olan bir şeydi. İnkişaf üçün rəqabət artmalıdı, açıq yarış getməlidir. Azərbaycanda reklam bazarı elədir ki, Azərbaycanda neçə kanal varsa reklam verənlər sanki aralarında danışıb aşağı yuxarı eyni miqdarda maliyə ayırırlar onlara.

Reklam bazarı kiminsə inhisarında olanda o verlişə baxılıb baxılmaması önəmli deyil, tamaşaçı önəmli deyil. Əslinə qalsa reklam verən öz məhsulunu kim yaxşı yayacaqsa ona, hansı kanal və verliş daha çox xeyir verəcəksə, ora reklam verməlidir. Azərbaycanda bu cür reklam verən var? Ümumiyyətlə reklam verən reklamdan asılıdırmı?

Ona görə də nəticədən danışmaq lazım deyil. Səbəbləri analiz etmək lazımdır. Hər şeyi azadlıq həll edir. O yoxdursa heç bir şey alınmayacaq. Yaradıcılıq məsələsinə gələndə isə, jurnalistika özü nə dərəcədə azatdır? O sifariş yerinə yetirir yoxsa azatdır? Məsələnin mahiyyəti bundadır. Sərbəst bazar olmadan nə normal prodüserlər, nə də senaristlər yetişəcək".

Attila
Ölkə.Az