Nəqliyyat Nazirliyində çex nümayəndə heyəti ilə görüş keçirilib

Nəqliyyat nazirinin müavini Musa Pənahov Çexiyanın Sənaye və ticarət naziri cənab Yan Mladek ilə görüşüb.

Bu barədə Ölkə.Az-a Nəqliyyat Nazirliyindən məlumat verilib.

“Nəqliyyat nazirinin müavini Musa Pənahov son illər Azərbaycanın nəqliyyat-yol kompleksinin fəaliyyətindən, burada həyata keçirilən layihələrdən, aparılan islahatlardan, əldə edilən nailiyyətlərdən danışıb. Daha sonra dəmir yolu, avtomobil nəqliyyatı və avtomobil yolları barəsində ətraflı məlumat verən Nəqliyyat nazirinin müavini Çexiya ilə Azərbaycan arasında nəqliyyat sahəsində əməkdaşlığın daha da inkişaf etdirilməsində tərəflərin maraqlı olduğunu vurğulayıb”- nazirliyin məlumatında deyilir.

Azərbaycan-Çexiya iqtisadi əlaqələri barədə məlumat verən Yan Mladek çex şirkətlərinin Azərbaycanda uğurla fəaliyyət göstərdiyini bildirib. İqtisadiyyatın bir çox sahələri ilə yanaşı nəqliyyat sektorunda da əlaqələrin böyük sürətlə inkişaf etdiyini vurğulayan çexiyalı nazir buna misal olaraq Azərbaycanda magistral avtomobil yollarının tikintisində görülən işləri nümunə kimi qeyd edib.

Nazir Azərbaycan üzərindən keçən Şərq-Qərb dəhlizinin fəaliyyətinə toxunaraq, malların Çindən öz ölkəsinə bu dəhlizlə daşınmasına maraq göstərdiklərini bildirib, eləcə də Bakı-Tbilisi-Qars dəmir yolu bağlantısında görülən işlərin vəziyyəti ilə maraqlanıb.

M.Pənahov bildirib ki, Asiya və Avropa arasında Azərbaycan üzərindən keçməklə birbaşa dəmir yolu bağlantısını təmin edən bu layihənin tamamlanmasından, həmçinin Yeni Bakı Beynəlxalq Dəniz Ticarət Limanının istifadəyə verilməsindən sonra bu istiqamətdə daşımalar vaxt və keyfiyyət baxımından daha səmərəli surətdə təmin ediləcək.

Görüş zamanı Çexiyanın “Skoda Transportation”, “Skoda Vagonka”, OHL ZS şirkətlərinin, eləcə də Çex İxrac Bankının nümayəndələri tərəfindən avtomobil, dəmir yolu nəqliyyatı, sərnişin nəqliyyatı sahəsində əməkdaşlıq mexanizmləri, qarşılıqlı əməkdaşlığın həyata keçirilməsi və perspektiv imkanlar barədə təkliflər irəli sürülüb.

Qeyd edək ki, görüşdə Çexiyanın Azərbaycandakı fövqəladə və səlahiyyətli səfiri cənab Vitezslav Pivonka da iştirak edib.

Ölkə.Az