Millət vəkili: "Avropa Oyunlarını Azərbaycanın əleyhinə çevirmək istəyən qüvvələr var"
"Belə böyük idman hadisəsi heç şübhəsiz ki, Azərbaycanın xarici informasiya məkanında və bütövlükdə dünyaya mühüm bir təqdimat imkanı deməkdir. Bir aya yaxın bir müddət ərzində dünyanın nəhəng informasiya kanallarının bizim ölkəmizdən, konkret Bakıdan reportajlar təqdim etməsi Azərbaycanı istər iqtisadi, istər ictimai, bütövlükdə bir millət olaraq geniş bir şəkildə təqdim etmək şəraiti yaradır".
Bu sözləri Ölkə.Az-a danışan millət vəkili Zahid Oruc deyib.
"Nəzərə alaq ki, BBC-də CCN-də bəzən reklam saniyələri milyon dollarlarla ölçülür və bunu bir kimsə asanlıqla bizə vermək istəmir.
Məsələnin bir tərəfi də bu turnirdən, tədbirlərdən sonrakı dövrdə Azərbaycana gələ biləcək investisiya axınıdır. Çünki ölkəmizi sabit bir şəraitdə görmək xarici iqtisadi əlaqələr üçün mühüm bir bazadır. Görünən odur ki, bunu həzm etməyən dairələr var.
Zənn edirəm ki, biz bu oyunları sülh əmin-amanlıq, dostluq əlaqələrinin qurulması və.s kimi yanaşdığımız halda başqaları üçün də ayrı bir oyun var. Onlar da öz oyunlarına hazırlaşırlar. Görünən budur ki, bizi informasiya müstəvisində ləkələmək, bu tədbiri Azərbaycanın əlehinə çevirmək istəyən qüvvələr var. Xüsusilə də xalqın maraqları üzərində. Guya ki, dövlət büdcə pullarının bu işə getməsini qabardaraq onların sosial instinktivləri ilə oynamaq həddindədirlər.
Halbuki bu tədbir Azərbaycana həm maddi, həm də mənəvi qazanclar gətirəcək və biz bunu 100 gündən sonra görəcəyik.
Düşünürəm ki, qeyd etdiyim beynəlxalq propaqanda maşınına, onların oyunlarına öyrəşmişik. Biz bunları görmüşük və bu oyunlardan keçmişik.
Mən əminəm ki, Azərbaycan bu tədbiri, bu turniri elə səviyyədə keçirəcək ki, bu həm ölkə əhalisinin ilk növbədə maraqlarına cavab verəcək, həm də tarix üçün çox vacib hadisə kimi yaddaşlarda qalacaq".
Qeyd edək ki, prezidentin İctimai-siyasi məsələlər üzrə köməkçisi Əli Həsənov yerli qruplar və xarici dairələri I Avropa Oyunlarını ölkəmizə qarşı “qara piar” kampaniyası keçirməkdə ittiham edib.
Fatimə İbrahimova
Ölkə.Az
