BP: “Cənub qaz dəhlizi” Azərbaycanın rolunu artıracaq

“Bu, ildə 16 milyard kubmetr qaz deməkdir”.

Xəzər regionunun energetik resurslarını Avropa qaz bazarı ilə birləşdirəcək “Cənub qaz dəhlizi” Azərbaycanın qaz təchizatçısı kimi rolunu artıracaq.

Ölkə.Az xəbər verir ki, bu barədə Trend-ə “BP-Azerbaijan” şirkətinin mətbuat xidmətinin rəhbəri Tamam Bayatlı bildirib.

Onun sözlərinə görə, “Cənub qaz dəhlizi” Azərbaycanın vacib enerji resurslarının təchizatçısı kimi öz nüfuzunu möhkəmləndirəcək və Avropanın enerji təhlükəsizliyinin təminatına sərmayə yatırmağa davam edəcək.

Mətbuat xidmətinin rəhbərinin sözlərinə görə, “Cənub qaz dəhlizi” Avropaya yeni qaz mənbəyi və enerji resurslarının çatdırılmasını diversifikasiya imkanı təklif edir.

Bayatlı qeyd edib ki, bu layihə çərçivəsində böyük rəqəmlər mövcuddur.

“Bu, ildə 16 milyard kubmetr qaz, 45 milyard dollar sərmayə, iştirakçı ölkələrdə minlərlə yeni iş yeri; 3500 kilometr qaz kəməri deməkdir”, - o deyib.

Mətbuat xidmətinin rəhbərinin sözlərinə görə, “Şah Dəniz” yatağının işlənməsi layihəsinin operatoru olan BP şirkəti hal-hazırda “Cənub qaz dəhlizi”nin realizəsinə, əsasən də onun zamanında və büdcəyə uyğun başa çatdırılmasına diqqət yönəldib.

“Bu mərhələdə biz deyə bilərik ki, “Şah Dəniz-2” layihəsinin realizəsi cədvəl üzrə gedir, və Türkiyəyə ilk qaz nəqli 2018-ci ildə, Avropaya isə 2020-ci ildə olacaq”, - Bayatlı deyib.

Onun sözlərinə görə, “Cənub qaz dəhlizi” realizəsinə cəlb edilmiş bütün ölkələrə müsbət təsir edəcək, yeni dəniz obyektlərinin, ixrac infrastrukturlarının inşaatını təmin edəcək. Yaradılan obyekt və infrastrukturlar beynəlxalq standartlara uyğun istismar ediləcək.

“Bütün sadalananlar, şirkət tərəfindən Xəzər regionu və digər ölkələrdə daha çox qazın emalına vasitə olacaq mühüm amillərdir”, Bayatlı vurğulayıb.

Ölkə.Az