Gədəbəydə daha iki kənddə poçt məntəqəsi tikiləcək

Ötən il Gədəbəy rayonunun ucqar kəndlərində poçt məntəqələri tikilərək istifadəyə verilib.

Ölkə.az Kəpəz televiziyasına (Region TV) istinadən xəbər verir ki, gələcəkdə əhaliyə göstərilən xidmətin keyfiyyətini artırmaq və xidmətlərdən daha yaxşı yararlanmaq üçün iki kənddə də poçt məntəqələri tikiləcək.

Hazırda Gədəbəy rayonu üzrə 31 poçt məntəqəsi fəaliyyət göstərir, bunlardan 2-si ötən il istifadəyə verilib.

Ötən il rayonun Ermənistanla sərhəddə yerləşən Çobankənd və Göyəlli kəndlərində yeni poçt məntəqələri inşa edilib. Əvvəllər həmin kəndlərdə yaşayan sakinlər poçt xidmətlərindən istifadə etmək üçün ya rayon mərkəzinə, ya da poçt məntəqəsi olan digər kəndlərə üz tuturdular. İndi isə ucqar kəndlərdə inşa edilən yeni poçt məntəqələri bu problemləri aradan qaldırıb.

Bununla yanaşı, bu il rayonun İnəkboğan və Çaldaş kəndlərində də yeni poçt binalarının inşası planlaşdırılır. Gələcəkdə isə Gədəbəy rayon poçt filialı tərəfindən göstərilən xidmətlərin keyfiyyətini yüksəltmək məqsədi ilə bir sıra yeniliklərin həyata keçirilməsi nəzərdə tutulub.

Ölkə.Az