"Palmali" suya yeni gəmi endirib

Türkiyədə fəaliyyət göstərən "Palmali" Şirkətlər Qrupu öz tərsanəsində inşa etdiyi ilk gəmisini suya endirdi.

"Palmali" Şirkətlər Qrupunun mətbuat xidmətindən verilən məlumata görə, dünya sularında üzəcək nəhəng tankerə “Olga Golovuşkina” adı verildi.

"Palmali" Şirkətlər Qrupunun Türkiyənin İzmit bölgəsində yerləşən “Armada Shipyard” tərsanəsində ilk gəminin suya salınma mərasimi keçirilib. Gəminin əsas korpusunun inşası 2014-cü ilin may ayında başlayıb.

Yeni layihəyə əsasən hazırlanan tanker daha da gücləndirilmiş dəniz funksiyasına malik olmaqla, bütün beynəlxalq daşıma tələblərinə tam cavab verir. Layihələndirmə zamanı dünya neft şirkətlərinin xüsusi tələbləri və əlavə ekoloji məhdudiyyətlər nəzərə alınıb.

Təntənəli tədbirə "Palmali" şirkətlər qrupunun prezidenti Mübariz Mənsimov, Rusiyanın Istanbuldakı baş konsulu Alexey Yerxov nüfuzlu iş adamları və siyasətçiləri də qatılıb. Mərasimdə söz alan "Palmali" Şirkətlər Qrupunun prezidenti Mübariz Mənsimov bu il daha 4 gəminin öz tərsanəsində buraxılacağını deyib.

Yelena Storojeva-Golovushkina anasının adını daşıyan gəminin xaç anası olub və dənizçi adət ənənələrinə uyğun olaraq şampan şüşəsini gəminin gövdəsinə çırparaq gəmiyə uğurlu yol arzulayıb.

“Olga Qolovuşkina neft sənayesində, xüsusilə də loqistika sahəsində tanınmış mütəxəssislərdən, “Palmali”nin önəmli tərfdaşlarından biri olub. Mübariz Mənsimovun ona bir vəfa borcu var idi və onun xatirəsini də belə yaşadıb”,- deyə mətbuat xidmətinin məlumatında bildirilir.

Gəmi texniki xüsusiyyətlərinə görə Volqa-Don bərə keçidindən və Volqa-Baltiysk su yollarından keçmə qabiliyyətinə malikdir. Tanker dəniz şəraitində 7500 ton dedveyt yük götürür.

“Palmali” Şirkətlər Qrupu Aralıq dənizi, Xəzər və Qara dəniz sularında əsasən SOCAR və LUKOYL kimi neft şirkətlərinin yüklərini daşıyır. Həmçinin şirkət digər böyük neft və neft məhsulları şirkətləri ilə uzunmüddətli müqavilələrə malikdir.

Ölkə.Az