SOCAR rəsmisi: 60 dollar az qiymət deyil

Xoşbəxt Yusifzadə çətinliklərdən danışdı.

Azərbaycanın bu gün təsdiq olunmuş 2 trilyon 550 milyard kubmetr qaz ehtiyatları var. Azərbaycan yeni qoşulacaq layihələrdə nəzərdə tutulmuş kəmərləri qaz ehtiyatları ilə problemsiz təmin edə biləcək.

Bu sözləri 3-cü Caspian Energy Forumunda çıxışı zamanı Azərbaycan Dövlət Neft Şirkətinin (SOCAR) vitse-prezidenti, akademik Xoşbəxt Yusifzadə bildirib.

Onun sözlərinə görə, nəzərdə tutulub ki, yeni layihələrə Türkmənistan, İran da qoşulsun:

“Hələlik bu barədə dəqiq məlumat yoxdur”, - deyə Xoşbəxt Yusifzadə bildirdi.

Xoşbəxt Yusifzadə çətinliklərdən də danışdı.

“Hal-hazırda bizim Xəzərdə üzən qazma qurğularımız yoxdur. Güman ki, 2018-ci ildə Xəzərdə yeni üzən qazma qurğusu reallaşdırılsın. Bunun səbəbi isə BP-nin istismar strategiyasınıN dəyişdirilməsi ilə bağlıdır”, deyə o bildirdi.

Neftin hazırkı qiymətlərindən danışan SOCAR-ın vitse-prezidenti bildirib ki, 1994-cü ildə “Əsrin müqaviləsi” imzalananda neftin bir barelinin qiyməti 16 dollar idi.

“Sonra qiymət 16 dollardan 100 dollaradək yüksəldi və hamımız buna sevindik. Lakin qiymətlərin qalxan vaxtı olanda, düşən vaxtı da olacaq. Mən çox belə hadisələr görmüşəm, bu proses dalğavarıdır. Ya bahalaşır, ya da ucuzlaşır. İndi qiymətlər bir az düşüb, amma yenə də bahalaşacaq. 60 dollar az qiymət deyil. Ola bilsin ki, müəyyən xərclər azalsın. Amma hansı quyular ki, qazılmalıdır, o işlər görüləcək. Həmin işlər dayanmayacaq”.

Ölkə.Az