Bakıda mistik tapıntı: Ailəyə qarşı dəhşətli sürpriz

“Ailənin vəziyyətinin getdikcə bundan da pis olacağı gözlənilir”.

Bakı dairəvi yolunda, Lökbatan qəsəbəsi ərazisinə düşən yol kənarının abadlaşdırılması işlərini aparanlar torpaq qatının altından iki ədəd müəmmalı bağlama tapıblar.

Ölkə.Az xəbər verir ki, bununla bağlı dərhal əməkdaşlar ANS TV-nin “Qaynar xətt”inə müraciət edib.

Həmin bağlamaların içərisində müxtəlif iynələr, gəlincik, ailəyə məxsus rəsmlər mövcud idi. Bundan əlavə üzərində müxtəlif yazılar olan kağızlar vardı. Əməkdaşlar deyir ki, burada ağac əkərkən iki sellofan torba tapıblar. Ancaq həmin torbalardan birini yandırıblar. Onlar ehtimal edir ki, mistik düşüncəli insanlar rəsmdə olan ailəyə qarşı dəhşətli sürpriz hazırlayıblar.

Bağlamanı tapan şəxs Ayaz Hüseynovun sözlərinə görə, ərazidə yaşıllaşdırma işi apararkən iki ədəd sellofan torba tapılıb:

“Onlardan birini yandırdıq. Yandırdığımız sellofanın içinə baxmadıq. Digər sellofanın içərisində isə müxtəlif iynələr, gəlincik, ailəyə məxsus rəsmlər vardı”.

Həmin bağlamaların doğrudanmı mistik düşüncəli insanlar tərəfindən hazırlandığını müəyyən etmək üçün ekstrasens Timur Nəsirov, ilk olaraq bağlamaya baxış keçirdi.

Qutudan çıxan əşyalarla bağlı müxtəlif fikirlər irəli sürdü:

“Ümumiyyətlə ailə daxilində çox pis olaylar baş verir. Ailənin vəziyyətinin getdikcə bundan da pis olacağı gözlənilir. Gördüyünüz bu müxtəlif iynələr, gəlincik, ailəyə məxsus rəsmlər burada təzə basdırılıb. Bunun məhz yol qırağında basdırılmasına gəlincə isə bu bir o qədər də əhəmiyyət daşımır, insanlar harada gəldi basdırırlar. Amma ola bilsin ki, ailə bu yoldan daha çox istifadə edir. Onlar bu yoldan istifadə edərkən qəza baş versin deyə bağlama burada basdırılıb”.

Daha sonra Nəsirov bağlamanın içərisindəki gəlinciyin üzərindəki iynələri çıxartdı. Və bildirdi ki, rəsmdə olan ailəyə bacardığı qədər kömək edəcək. Bu məqsədlə də o, həmin bağlamanı götürüb uzaqlaşdı.

Ölkə.Az