Hərbi ekspertdən Daxili Qoşunlarla bağlı

"Qarabağ zonasında daxili qoşunlara xüsusi yer verilməlidir"

"Düşünürəm ki, biz bir qədər strukturlarımızı dəyişməliyik. Qarabağ zonasında daxili qoşunların istifadəsi daha geniş olmalıdır. İşğal olunmuş sərhədlərdə sərhəd qoşunlarından istifadə etmək daha məqsədə uyğun olardı. Və bu imkan verəcəkdir ki, daha milli ordu ikinci eşelon kimi hücum üçün hazırlaşsın. Bu gün faktiki olaraq Azərbaycan əsgəri cəbhə boyunca müdafiə mövqeyində dayanıb. Bu strateji baxımdan ordunun istiqamətini zəiflədir".

Bu sözləri Ölkə.az-a hərbi ekspert Azad İsazadə deyib. O, Daxili Qoşunların müharibə illərindəki aktivliyindən də danışıb.

"Azərbaycanın daxili qoşunları elə müharibə illərində formalaşmağa başladı. Daxili qoşunların Azərbaycan torpaqlarının azadlığı uğrunda xüsusi yeri var. Onlar bu döyüşlərdə xüsusi olaraq döyüşüblər. Qarabağ müharibəsini yenidən xatırlasaq görərik ki, heç də az iş görməyib. Ona görə də Qarabağ zonasında daxili qoşunlara xüsusi yer verilməlidir".

Qeyd edək ki, Daxili Qoşunlar aşağıdakı vəzifələri yerinə yetirirlər:

- digər daxili işlər orqanları ilə birlikdə şəhərlərdə və digər yaşayış məntəqələrində post-patrul xidməti vasitəsilə ictimai asayişin qorunmasında, habelə kütləvi tədbirlər keçirilərkən ictimai təhlükəsizliyin təmin olunmasında iştirak edir;

- mühüm dövlət obyektlərini, kommunikasiya qurğularını, xüsusi yükləri mühafizə edir;

- mühafizə olunan əraziyə soxulmuş şəxslərin axtarılmasında və tutulmasında iştirak edir;

- Azərbaycan Respublikası Daxili İşlər Nazirliyinin Təchizat İdarəsinin anbarlarını və hərbi bazalarını mühafizə edir;

- mühafizə olunan obyektlərdə və qurğularda qəzaların, yanğınların, təbii fəlakətlərin və buna bənzər başqa halların nəticələrinin ləğvində iştirak edir;

- yaşayış məntəqələrində kütləvi iğtişaşların qarşısının alınmasında iştirak edir;

- qəzalar, bədbəxt hadisələr, yanğınlar, təbii fəlakətlər və başqa fövqəladə hallar zamanı, habelə fövqəladə vəziyyətin hüquqi rejimi təmin edilərkən adamların xilas edilməsi, sahibsiz qalmış əmlakın mühafizəsi, ictimai asayişin qorunması üçün təxirəsalınmaz tədbirlər görməklə daxili işlər orqanlarına kömək göstərir;

- cəzaçəkmə müəssisələrində kütləvi iğtişaşların qarşısını almağa kömək göstərir;

- mühafizədən qaçmış məhkumların və həbs edilmiş şəxslərin axtarılmasında və tutulmasında iştirak edir;

- zərurət olduqda Azərbaycan Respublikasının ərazisinin müdafiəsində iştirak edir.

Daxili Qoşunlara başqa vəzifələr ancaq qanunla həvalə edilə bilər.

Fatimə İbrahimova
Ölkə.az