Ziya Məmmədov qətərli həmkarı ilə görüşdü

Martın 16-da Azərbaycanın nəqliyyat naziri Ziya Məmmədov Qətər Dövlətinin nəqliyyat naziri Cassim Saif Əhməd Al-Sulaiti ilə görüşüb.

Bu barədə Ölkə.Az-a nazirlikdən məlumat verilib.

Görüşdə Ziya Məmmədov son illər Azərbaycan iqtisadiyyatının inkişafından, irimiqyaslı islahatların həyata keçirilməsindən, beynəlxalq inteqrasiyada əldə edilən irəliləyişlərdən, o cümlədən Azərbaycanın yol-nəqliyyat sektorundakı yeniliklərdən, həmçinin həyata keçirilən iri regional layihələrdən danışıb.

Nəqliyyatın Azərbaycan iqtisadiyyatında prioritet sahələrdən biri olduğunu deyən Z.Məmmədov bu sahəyə dövlət səviyyəsində xüsusi diqqət yetirildiyini vurğulayıb. Nəqliyyat sektorunu əhatə edən sahələr – hava və dəmir yolları, avtomobil nəqliyyatı və avtomobil yolları barəsində ətraflı məlumat verən nazir bu istiqamətdə Qətərlə əməkdaşlığın daha da inkişaf etdirilməsinin zəruri olduğunu və bu əməkdaşlığın hər iki dövlətin nəqliyyat infrastrukturunun inkişafına xidmət etdiyini diqqətə çatdırıb.

Öz növbəsində, görüşdə Azərbaycan və Qətər dövlətləri arasında nəqliyyat sahəsində əməkdaşlıq imkanları, perspektiv layihələr və görülən işlər, Qətər şirkətlərinin Azərbaycanda nəqliyyat sahəsində həyata keçirilən layihələrdə iştirak imkanları və s. məsələlər ətrafında fikir mübadiləsi aparılıb.