“Bütün klubların bizə borcu var”

Azərbaycan Premyer Liqasında mübarizə aparan klubların bu mövsüm üçün (bugünkü tarixə qədər) Peşəkar Futbol Liqasına (PFL) ümumən 153 min ödəməlidir.

Ölkə.Az-ın futbolpress.az saytına istinadən yaydığı xəbərə görə, bu haqda PFL-dən bildirilib.

Premyer Liqanın geridə qalan 25 turundan sonra komandaların cərimələrinin məbləği 153 min 200 manatdır. İntizam Komitəsinin qərarlarına əsasən tətbiq olunan hüquqi (maddi) sanksiyalar Peşəkar PFL-in büdcəsinin bir hissəsini tәşkil edir. Bundan əlavə qurumun büdcəsinə klublarda oynayan legioner futbolçuların üzvlük haqları da daxil olur.

Bildirilib ki, klubların heç də hamısı bu məbləği vaxtlı-vaxtında ödəmir.

Məsələ ilə bağlı PFL-in Mətbuat və İctimaiyyətlə Əlaqələr Departamentinin rəhbəri Aslan Şahgəldiyev bildirib ki, klublar həm cərimələri, həm də legioner futbolçuların üzvlük haqlarını gecikdirir:

"Klubların bizə təkcə cərimələrə görə yox, həm də legioner futbolçuların üzvlük haqqına görə borcları var. Klublarımız bu pulu tam ödəyə bilmədiyinə görə hissə-hissə ödəyirlər. Hansı klubun tez ödədiyini və ya nə qədər borclu olduğunu dəqiq deyə bilmərəm. Bütün klublarda vəziyyət eynidir. Yalnız onu dəqiq deyә bilərəm ki, Premyer Liqadakı bütün klubların bizə borcu var".

A.Şahgəldiyev I Divizion təmsilçilərinin də cərimələri ödəməkdə gecikdiyini bildirib:

"I divizionda legioner az olduğuna görə əsas borc cərimələrə görə olan ödənişlərdi. Buna baxmayaraq, onlarda da müəyyən gecikmələr olur".

Ölkə.Az