"Bələdiyyələrin “torpaqsatan” stereotipini dağıtmaq bizim əsas məqsədlərimizdən biridir"

"Bütün ölkələrdə bələdiyyələrin yerli özünüidarə orqanı kimi cəmiyyətdə böyük rolu var"

Ölkə.az-ın "Tanınmamış məşhurlar" layihəsinin buhəftəki qonağı Azərbaycan Ümid Partiyası "Beynəlxalq əlaqələr" şöbəsinin müdiri, "125-lər" Siyasi Klubunun sədr müavini Tamilla Qulamıdır.

Onunla söhbətimiz ölkədəki bələdiyyələrin fəaliyyəti mövzusunda oldu.

-Bildiyiniz kimi hazırda ölkədə bələdiyyələri lazımsız sayan insanlar az deyil. Bəs, siz necə düşünürsünüz?

-Bələdiyyələrin həyata keçirilən quruculuq işlərində fəal iştirakının vacibliyi, eləcə də vətəndaş məmnunluğu, əhalinin rifahı naminə təşəbbüskarlığının əhəmiyyəti əsasdır. Təəssüflər olsun ki, bizim ölkədə çox vaxt deyirlər, bələdiyyələr İcra Hakimiyyətinin 5-ci təkəri rolunu oynayır. Əslində hər hansı bir rayon üzrə məsul olan orqanlar birlikdə işləyərsə, o rayonda problemlərin həlli yolunda qarşılıqlı işlərin görülməsi, işdə təcrübəli olanların tövsiyyə və məsləhətləri sayəsində öz yerini tapır. Bələdiyyələrin “torpaqsatan” stereotipini dağıtmaq bizim əsas məqsədlərimizdən biridir.

-Bələdiyyə seçkiləri zamanı Binəqədi seçiciləri sözügedən ərazidə daha çox problem olduğunu sosial şəbəkə vasitəsi ilə qabardırdılar. İndi isə nisbi sakitlikdir. Vəziyyət nə yerdədir?

-Bildiyiniz kimi seçkilərdən Binəqədi rayonu üzrə namizədliyimi irəli sürdüm. Hal-hazırda bələdiyyənin Yerli Ekologiya Məsələləri üzrə Daimi Komissiyasının üzvüyəm. Bu ilin seçkilərində mənimlə yanaşı partiyadaşlarım, bir çox tanışlarım da bələdiyyə seçkilərində iştirak etdi. Ümumi gedişata baxanda görürəm, necə ki, seçkilər zamanı Binəqədi seçiciləri seçkilərdə aktivliyi ilə seçilirdi, eləcə də bələdiyyəmiz digər bələdiyyələrdən seçilir. Sakinlərin asudə vaxtlarının səmərəli keçirilməsi üçün yeni parklar salınır, bələdiyyəmizin problemli ərazilərindən olan - Novxanıdan başlayan sukanal və dəmiryol boyu ərazilərdə aparılan təmizlik abadlıq işləri aparılır. Bələdiyyənin iş bölgüləri üzrə işlər öz aktivliyi ilə davam edir. Sakinlərlə - ağsaqqallar, ziyalılar, gənclərlə görüşür, üzərimizə düşən öhdəlik olaraq, sakinlərin təklif və iradlarını qəbul edir, fəaliyyət planı üzərində işləyirik...

-Fəaliyyətinizi daha da genişləndirməyi düşünürsünüzmü?

-Əlbəttə. Fəaliyyətimizi daha da genişləndirmək, yerli özünüidarənin quruculuq işlərində aktivliyinin artırılması yönündə daim təcrübəli əməkdaşların tövsiyyələrini dinləyirik. Bu hər bir yerli özünüidarə orqanı üçün lazımlı məsələdir. Biz də belə edirik.

-Səfərlərinizdən danışaq. 07-11 martda Azərbaycanın bələdiyyə sədrləri Ankara Büyükşehir və Keçiörenə yollandı. Səfər necə keçdi?

-Bəli, 07-11 martda Azərbaycanın bələdiyyə sədrləri Ankara Büyükşehir və Keçiören bələdiyyələrinin fəaliyyəti ilə tanış olub. Səfər çərçivəsində “Bələdiyyə idarəçiliyinin aktual problemləri” istiqamətinin ixtisasartırma növü üzrə əlavə təhsil kursu iştirakçıları Ankara Büyükşehir və Keçiören bələdiyyələrini ziyarət edərək onların fəaliyyətləri ilə yaxından tanış olublar. Ankara Büyükşehir və Keçiören bələdiyyələri ərazisini əhatə edən özütikililərin yerində yeni parkların, fəvvarələrin salınması, yaşayış binalarının ucaldılması, eləcə də bələdiyyələr tərəfindən həyata keçirilən məişət tullantılarının daşınaraq zərərsizləşdirilməsi sahəsində görülən işlər barədə məlumat verilib. Səfərin sonunda iştirakçılar Keçiören bələdiyyəsi tərəfindən Xocalı şəhidlərinin xatirəsinə ucaldılmış abidəni ziyarət edib, faciə qurbanlarının xatirəsini yad ediblər. Qeyd edim ki, səfərdə Binəqədi rayonunu 2 bələdiyyə sədri - Azərbaycan Qəsəbə Bələdiyyələrinin Milli Assosasiyasının sədri, Binəqədi rayon Bələdiyyələr Şurasının sədri, Binəqədi Bələdiyyəsinin sədri Sitarə Cabbarlı, Binəqədi rayonu M.Ə.Rəsulzadə bələdiyyəsinin sədri Hümbət Hüseynov təmsil edib.

-İcra Hakimiyyətinin sonuncu dəfə bələdiyyə üzvləri ilə görüşü nə zaman keçirilib?

-14 martda Binəqədi rayonu İcra Hakimiyyətinin başçısı Xaləddin İsgəndərov bələdiyyə üzvləri ilə görüşdü. Görüşdə məqsəd bələdiyyə üzvləri ilə tanışlıq, gələcək fəaliyyət istiqamətlərimizlə bağlı tövsiyyələr vermək idi.

-Ümumi gedişat nədən xəbər verir?

-Ümumi gedişata nəzərən inanıram ki, Binəqədi rayon Binəqədi Bələdiyyəsi ölkənin bələdiyyələri sıralarında ön yerlərdən birində olacaq. Yaxşı olardı ki, bütün bələdiyyələr millətimizin yaşayış problemlərinin həllinə töhvələr vermək üçün bir-birilə sıx əməkdaşlıq yaratsın, Azərbaycanımızın rifahı naminə bir-birindən örnək götürsün. Hər birimiz aid olduğumuz ərazinin problemlərinin həlli üçün çalışsa, bütöv Azərbaycan üçün faydalı iş görmüş olarıq.

-Son olaraq nə deyə bilərsiniz?

-Son olaraq onu deyə bilərəm ki, seçilmişiksə, seçicilərin etimadını doğrultmalıyıq. Çünki seçici üçün heç bir fərqi yoxdur, mən müxalifətəm, yoxsa iqtidar. Seçici üçün əsas olan öz probleminin həll olunmasıdır.