Fazil Mustafa: "Sarkisyanın bu çıxışı Rusiya ictimai rəyinə təsir göstərmək məqsədi daşıyır"

"Rusiyanın müxtəlif səbəblər əsasında Azərbaycana silah satması hər şeydən öncə Ermənistanı qorxudur. Çünki onlar elə düşünür bəlkə Azərbaycanın daha üstün mövqeyə keçməsinə Rusiya şərait yarada bilər".

Bu sözləri Ölkə.Az-a danışan millət vəkili Fazil Mustafa Rusiyanın Azərbaycana silah satmasından Ermənistanda yaranan narahatlığı şərh edərkən deyib.

"Biz faktiki olaraq baxsaq görərik ki, Rusiya Ermənistanı təmənnasız olaraq silahla təmin edir. Ona görə də bu məsələdə Ermənistanın narahat olmasına əsas var.
Ermənistan Azərbaycanın hər hansısa bir şəkildə inkişafını qəbul edə bilmir. Ona görə də, müəyyən məsələlərin həll istiqamətində sırf ölkəmizi zəiflətmək məqsədi ilə müəyyən addımlar atır.
Ermənistan prezidentinin sonuncu çıxışına gəlincə, bu Rusiya ictimai rəyinə təsir göstərmək məqsədi ilə atılan addımdır. Düşünürəm ki, Sarkisyanın bu çıxışı Rusiya ictimai rəyinə təsir göstərmək məqsədi daşıyır".

Xatırladaq ki, bu gün Ermənisatan prezidenti Serj Sarkisyan Rusiyanın Azərbaycana silah satmasından narahat olduğunu bildirmişdi.

Fatimə İbrahimova
Ölkə.Az