Bu gün iki Milli Qəhrəmanımızın doğum günüdür
İxtiyar Qasımov yaralı yoldaşlarını xilas edərkən şəhid olub.
Milli qəhrəman İxtiyar Qasımov Qasım oğlu 22 mart 1970-ci ildə Ağdam rayonunun Salahlı kəndində anadan olub. 1977-ci ildə Salahlı kənd orta məktəbinin birinci sinifinə gebib və səkkizinci sinifə qədər orada təhsil alıb. 1985-ci ildlə Bakıya gələrək təhsilini burada davam etdirir. 1992-ci ildə könüllü olaraq hərbi komissarlığa müraciət edərək döyüşlərə göndərilməsini xahiş edir.
Oxu.Az-ın məlumatına görə, İxtiyarı “N” saylı hərbi hissəyə təhkim edirlər və o, döyüşə kəşfiyyatçı kimi başlayır. O, ilk günlərdən özünə ad-sad qazanır və seçdiyi düzgün qərarın nəticəsi olaraq Qazançı kəndində ermənilərin üç PDM-si, bir zirehli maşını və onlarla canlı qüvvəsi məhv edildi. 1992-ci il mayın 15-də Ağdamın Abdal-Gülablı kəndinin müdafiəsində xüsusi fərqlənir. 1992-ci il 14 iyul tarixdə ermənilər Canyataq kəndinə hücuma keçirlər, burada bir neçə döyüşçü yaralanır. İxtiyar kəndin müdafiəsi zamanı axıra qədər vuruşur, təkbaşına düşmənin qarşısını saxlayır və qəhrəmanlıqla həlak olur. O, yaralı döyüş yoldaşlarının erməni qəsbkarlarının əlinə keçməməsi üçün özünü qabağa ataraq əks hücumun qarşısını almağa çalışır. Yaralıları xilas edirlər, İxtiyar özü isə qəhrəmancasına həlak olur.
Azərbaycan Respublikası prezidentinin 7 dekabr 1992-ci il tarixli 350 saylı fərmanı ilə Qasımov İxtiyar Qasım oğlu ölümündən sonra “Azərbaycanın Milli Qəhrəmanı” adına layiq görülmüşdür.
Salahlı kənd qəbristanlığında dəfn edilib.
Vaxtilə oxuduğu Salahlı kənd orta məktəbi onun adını daşıyır.
22 mart həmçinin Azərbaycanın Milli qəhrəmanı Əsəd Əsədovun da doğum günüdür.
Əsəd Soltan oğlu Əsədov 1956-cı il martın 22-də Zəngilan rayonunun Turabad kəndində anadan olub. Hərbi təyyarəçi kimi Qarabağ səmasında rəşadətlə vuruşub, düşmənə ağır zərbələr vurub.
29 oktyabr 1991-ci il AN-2 təyyarəsinin komandiri Əsəd Əsədov 7 nəfər uçuş və texniki heyətlə Yevlax aeroportundan səmaya qalxdı. Xocalı aeroportunda ermənilərdən ibarət işçi qrupunu aeroportun texniki istismarından uzaqlaşdiran AZAL-ın əməkdaşları şərəfli missiyanı yerinə yetirib geriyə uçarkən təyyarə düşmən tərəfindən ALAZAN raketi ilə vuruldu. Cəsur komandir bu uçuş zamanı heyət üzvləri ilə birlikdə həlak oldu.
Azərbaycan Respublikası prezidentinin 25 noyabr 1992-ci il tarixli 337 saylı fərmanı ilə Əsədov Əsəd Soltan oğlu ölümündən sonra “Azərbaycanın Milli Qəhrəmanı” adına layiq görülmüşdür.
Zəngilan rayonunda dəfn edilmişdir.
Zəngilan rayonu Turabad kənd orta məktəbi və Mincivan qəsəbəsindəki mərkəzi küçələrdən biri onun adını daşıyır.
Ölkə.az
