Lamiyə haqqında kitab belə adlanacaq

Kitabın adı necə olacaq?

Ölkə.Az xəbər verir ki, Lamiyə Quliyevanın keçmiş nişanlısı, ömürlük həbsdə olan Vüqar Əliyevin vəkili Adəm Məmmədov "Facebook" sosial şəbəkəsində Lamiyənin həyatından bəhs edən kitab barədə yazıb.

"Əziz dostlar! Bildiyiniz kimi, "Lamiyə" olayında həqiqətələrin aşkar olunması Lamiyənin azadlığa buraxılmasına gətirib çıxaran nəticələr verdi. Bildiyiniz kimi, mən, Lamiyənin nişanlısı olan, Vüqar Əliyevin hüquqlarını müdafiə edirəm. Müəyyən subyektiv səbəblərdən mart ayındakı əfv sərəncamında Vüqar Əliyevin adı qeyd olunmadı, lakin, bildirmək istərdim ki, Vüqar Əliyevin möhtərəm prezidentimizə müraciətlə təqdim etdiyi əfv ərizəsi Prezident Administrasiyası tərəfindən qəbul edilmişdir və yaxın gələcəkdə icra olunması gözlənilir...

Həmçinin, nəzərinizə çatdırmaq istərdim ki, Vüqar Əliyevin və onun nişanlısı Lamiyə Quliyevanın başlarına gətirilən hadisələr barədə tam ətraflı və təfsilatlı şəkildə kitab üzərində işləyirik, çox yaxın zamanda bu kitab Azərbaycan dilində "Qobustan qəbiristanlığının diri sakininin harayı" adı altında işıq üzü görəcəkdir. Bu kitabda günahsız bir cavanın başına gətirilən hadisələr, verilən işgəncələr, hər an ölümlə üzbəüz qalaraq ölüm-dirim savaşı və digər cinayət aləmində baş verən bir sıra maraqlı hadisələr öz əksini tapmışdır. Ümidvaram ki, bu kitab sizlərdə maraq oyadacaq və bu kitabı oxuyarkən siz də o anları fikrən yaşayaraq həmin hissləri keçirəcəksiniz".

Xatırladaq ki, Lamiyə Quliyeva Şəmkirin sabiq icra başçısı Aslan Aslanovun oğlu Ruslan Aslanovu öldürməkdə ittiham olunub və 10 il azadlıqdan məhrum edilib. O, həbsdə olarkən həbsxanada daxili intizam qaydalarını pozduğu üçün yenidən 6.5 il müddətinə cəzası artırılıb. Fevralın 20-i isə Bakı Apellyasiya Məhkəməsində Lamiyə Quliyevanın barəsindəki cinayət işi üzrə Baş Prokurorluğun verdiyi protest əsasında məhkəmə prosesi keçirilib və o, azadlığa buraxılıb.

Rəşid Mustafazadə

Ölkə.Az