Sənada hava zərbələri davam edir

Sənada hava zərbələri nəticəsində 24 nəfər həlak olub.

Ölkə.Az "TASS" agentliyinə istinad edərək xəbər verir ki, Yəmən Daxili işlər nazirliyinin məlumatına əsasən, Sənada hava zərbələri nəticəsində 24 nəfər ölüb, 43 nəfər isə yaralanıb.

Ölənlər arasında təkcə Yəmən hərbi-hava qüvvələrinin ikinci briqadasının hərbçiləri və polislər yox, həm də dinc sakinlər və təhlükəsizlik qüvvələrinin əməkdaşları olub. Bildirilir ki, Səudiyyə Ərəbistan hərbi-hava qüvvələri və müttəfiq dövlətlər Yəmən paytaxtının həyati əhəmiyyətə malik obyektlərə zərbələr endirməyə davam edir. Bir sutka ərzində şəhərdə 14 bina dağıdılıb.

Xatırladaq ki, Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Rəşid Mustafazadə

Ölkə.Az