Bir gün maşınınızın üstündən keçəcəm!
Günel Emin
"Nəbadə" adlı yazımın davamını yazmaq qərarına gəldim.
Bu yazı tənqidi tərzdə yazılmasına baxmayaraq, maariflənmə və müsbət nəticə çıxardıb bu nöqsanlarımızı özümüzdə görüb düzəltmək məqsədilə yazılmışdır. Kimisə təhqir etmək və ya alçaltmaq niyyətim yoxdur. Məni sevindirən hal o oldu ki, son zamanlar bayram günləri ilə əlaqədar axşam qaranlıq düşəndən sonra da şəhərimizdə gəzməyimə baxmayaraq, gəzintim sərgüzəştsiz keçdi və müsbət nəticəli müşahidələrim yarandı. Hələ hər şey itirilməyib. Deməli düzəlməyimiz üçün gərək kimsə önə düşüb tənqid etsin...
Buna baxmayaraq tənqid etməyə də mövzular var. Bunula əlaqədar olaraq yazıma davam edirəm...
1. Nəbadə, yerli özəl televiziya kanallarımıza baxasan - tərbiyə etmək əvəzinə kobudluğu, mədəniyyətsizliyi və əxlaqsızlığı yayır (İctimai TV və AzTV xaric). Bəzi aparıcıları və jurnalistləri, ekspertləri hansı xüsusiyyətlərinə görə, hansı məntiqlə, düşüncə ilə seçirlər bilmirsən. Aparıcıların isə səs tonunun, danışıq tərzinin, efir mədəniyyətinin olmaması, doğma dilimizi korlaması, çağırılan qonaq və ekspertlərə qarşı hörmətsizliyi, şəxsi həyata müdaxiləsi də ayrı bir biabırçılıqdır. Özlərinə sonra kənardan baxa və özlərinə tənqidi yanaşa bilmək qabiliyyətləri olsaydı, ən azından bir nəticə çıxarardılar...
Evə kompüterim və internetim var, onlayn olaraq proqram vasitəsi ilə kabel televiziyalarına baxıram, film yükləyirəm. Evdəki televizor isə artıq bəzək üçündür. Atam deyir, arada vur televizoru işləsin, sonra trubkası yatar.
Məncə jurnalist və aparıcı, ümumilikdə media həmişə bitərəf və qərəzsiz olmalıdır. Onların verilişlərinin isə mənası olmalıdır və məntiqə əsaslanmalıdır. Hələ nəbadə yerli şirkətlərimizin bəzilərinin zövqsüz reklamlarına baxasan! Nə bir bir məna var, nə bir keyfiyyət. Nə demək istəyirlər bilinmir, maraqsızdır...
2. Nəbadə, qadın və uşağın başına pis iş gələ, üstünə şər atıla, həmişə ictimai qınaq günahı qadında və uşaqda görəcək: "Özü yıxılan ağlamaz!", "Yaxşı at özünə qamçı vurdurmaz" və s. kimi atalar sözlərini də atmaca kimi atacaqlar, guya bunlar çox ağıllı və savadlıdırlar...
3. Çoxdan müşahidə etdiyim bir tendensiya var. Yolda piyadanın işıqfora əsasən yol keçməsi gərək olan zaman yerüstü və yeraltı keçidlər olmayan yerdə maşınlarını düz "zebraların" üzərində saxlayan sürücülər var, onlara üzümü tuturam, gələn dəfə maşınınızın üstündən keçəcəyəm, çünki piyada "zebradan" keçməlidir, "zebra" olan yerdə ondan kənar yerdən keçən şəxslər də cərimələnirlər. Bir gözəl insan və dostum həmişə mənə deyərdi: "Azərbaycanda piyada olanda sükan arxasında olanlardan, sükan arxasında olanda piyadalardan qorxuram". Hələ yeraltı və yerüstü keçidlərinin bəzilərinin hava yağıntılı olan vaxtlarda işlək vəziyyətdə olmamasını demirəm. Birdən çaşıb təmir edərlər, işləyər...
4. Bir çox dayanacaqlarda, əsasən şəhərin mərkəzindən kənarda avtobus dayanacaqlarına qoyulan informasiya monitorlarının çox zaman işlək vəziyyətdə olmaması faktından danışmıram... Birdən işləyər!
5. Daimi təmirdə olan və bağlı yollarımız da bizim ayrı dərdimizdir, bu yollara görə artıq çox şəxsi avtomobili olan sürücülər bütün alternativ yolları taksi sürücülərindən də yaxşı tanıyırlar...
6. Nəbadə, bəzi avtobuslara minəndə qulağında qulaqcıq olmaya və öz seçdiyin musiqini dinləməyəsən! Düzdür zövqlər mübahisə obyekti ola bilməz, amma daha bu dərəcədə zövqsüz mahnılar qoymayın, xahiş edirəm, ay sürücülər. Özü də ki, elə güclü səs verməyin, o səslə karın eşitmə qabiliyyəti açılar, eşidə bilənlər isə kar olar.
Düzdür, bəziləri radioya qulaq asır, bəziləri milli və tarixi irsimizi qoruyub xalq mahnılarına, musiqilərinə qulaq asırlar, özü də aşağı səslə. Onlara öz təşəkkürümü bildirirəm.
7. İndiki insanların bəziləri ya müğənni olmaq istəyir, müğənni ola bilməyənlər isə aktyor və aktrisa, yaxud model. Ay balam, soruşmaq istəyirəm SİZdən: "Əminsiniz ki, Sizin əsl sənət və işiniz, peşəniz o olmalıdır? Siz bu sənətə uyğunsunuz?!" Mənim də şükür xarici görkəm və fakturam var, yaradıcılığım da, yaradıcı yanaşmam da, improvizə edə bilirəm, ekpromt vəziyyətlərdən çıxıram, gur səsim də var, amma nə model, nə aktrisa, nə də ki, mügənni olmaq istəmirəm. Çünki bilirəm ki, uyğun deyiləm, gülünc görsənirəm, özümə tənqidi yanaşmağı və özümü bu peşə sahiblərinin yerinə qoyaraq özümə kənardan baxmağı bacarıram və görürəm ki, mən bu işə uyğun deyiləm. Bacardığınız və bildiyiniz işi görün, o peşəni və sahəni seçin! Hamı bunu edir deyə "mən də edim" düşüncəsi ilə yanaşmayın peşənizə. Bir sözlə fərdi olun, özünüz kimi olun...
8. Bəzi brend mağazaların satıcıları var, müştəri içəri girib baxıb nəsə almayıb çıxanda narazı sifət edirlər. İçəri girən hər kəsə geyimə və zahiri görkəmə görə qiymət verirlər, onlara demək istəyirəm: "Sənin işin satmaqdır, hər girən müştəri mütləq nəsə alacaq deyə heç bir qayda yoxdur, bunu artıq öyrənin"...
Ardı hələ var...
Ölkə.az
