Sərxoş polis polkovniki saxlanıldı

Şərifova işə çıxmaq qadağan edilib.

Bakıda rəis müavini sərxoş vəziyyətdə avtomobil idarə etdiyi üçün polislər tərəfindən saxlanılıb.

Ölkə.Az xəbər verir ki, Report-un məlumatına görə, hadisə bir neçə gün əvvəl Bakı-Quba yolunda qeydə alınıb.

Belə ki, Qaradağ rayon Polis İdarəsinin 38-ci Polis Bölməsinin (PB) rəis müavini, polis polkovnik-leytenantı Şərifov Rafiq Vaqif oğlunun idarə etdiyi 90-BZ-455 dövlət qeydiyyat nişanlı “Land Rover” markalı avtomobillə kobud qayda pozuntusuna yol verdiyi üçün yol polisləri ona “Saxla!” əmri verib.

Lakin rəis müavini yol polislərinə tabesizlik göstərərək maşını saxlamayıb. Saray qəsəbəsi ərazisindəki postda isə R.Şərifovu polislər məcburi qaydada saxlayaraq Abşeron rayon Polis İdarəsinə (RPİ) gətirib. R.Şərifov barəsində idarədə toplanan materiallar isə artıq Daxili İşlər Nazirliyinə (DİN) göndərilib. Hazırda rəis müavini barəsində DİN-in Daxili Təhqiqat İdarəsində araşdırma aparılır. Bu araşdırmaların yekununa qədər isə R.Şərifova 38-ci PB-də işə çıxmaq qadağan edilib.

Məsələ ilə bağlı BŞDYPİ-nin İctimaiyyətlə əlaqələr şöbəsinin rəhbəri Vaqif Əsədov Oxu.Az-a hadisə ilə bağlı heç bir məlumatının olmadığını bildirdi.

Ölkə.Az