Fərid Şahbazlı: "Radikal müxalifət partiyalarında diktatura hökm sürür"

"Azərbaycan iqtidarına demokratiya dərsi keçmək iddiasında olan bəlli insanların təmsil olunduğu partiyalarda cərəyan edən hadisələr onu bir daha sübut etdi ki, radikal müxalifətdə çox böyük diktatura rejimi hökm sürməkdədir".

Bu sözləri "İslahatçı Gənclər" İctimai Birliyinin sədri Fərid Şahbazlı AXCP Gənclər Komitəsinin üzvləri Ehtiram Mehdiyev və Cavid Musazadənin partiyadan xaric olunmasına münasibət bildirərkən deyib. O qeyd edib ki, gənclərin AXCP rəhbərliyində təmsil olunan şəxslərdən birini "Facebook" sosial şəbəkəsində tənqid etməsi səbəbindən partiyadan çıxarılması bu təşkilatdakı əsl reallığı üzə çıxarıb: "20 ildir ki, müxalifət liderləri sədrlik etdikləri partiyaları inhisarlarında saxlayırlar. Həmin siyasi təşkilatlar demokratik dəyərlərlə deyil, yalnız partiya sədrlərinin iradəsi ilə idarə olunur. Bu adamlar ən xırda tənqidə belə dözümsüzlük nümayiş etdirərək, onları haqlı olaraq tənqid edən tərəfi təhqir belə etməkdən çəkinmirlər. Hətta bu tənqidi edənlər onların eyni cəbhəni bölüşdükləri insanlar olsa belə, həmin şəxslərə dərhal satqın, xəyanətkar damğası vurmaqdan çəkinmirlər. Bu mənada AXCP-də baş verən son hadisələr məni heç də təəccübləndirmir. Öz partiyalarında elementar tənqidə, fikir müxtəlifliyinə dözümsüzlük nümayiş etdirən adamların Azərbaycan hakimiyyətini nədəsə ittiham etməyə heç bir haqqı çatmır".

F.Şahbazlı deyib ki, radikal müxalifət liderləri təmsil olduqları düşərgəni inhisarda saxlamaqla məşğuldurlar: "Onlar Azərbaycanda sağlam, dövlətçiliyə bağlı müxalifətin yetişməsinə imkan vermirlər"./Editor.az/

Ölkə.Az