Gürcüstan prezidenti təzyiqlərə görə vəzifədən gedə bilər?

Marqvelaşvili bəyan edib ki, ona açıq şəkildə təzyiq edilir.

Ölkə.Az "RİA Novosti" agentliyinə istinadən xəbər verir ki, Gürcüstan prezidenti Georgiy Maqvelaşvili üzərində açıq təzyiq hiss etdiyini, lakin bu mərhələdə özünü sakit apardığını bəyan edib.

Marqvelaşvili "Rustavi-2" teleşirkətinin efirində prezidentin təzyiqlərə görə vəzifəsinin tərk etməsi ilə bağlı suala cavab verib:

"Düşünürəm ki, mən detallara toxunmalı deyiləm...Bağlı qapılar arxasında baxılan məsələlər elə orada da qalmalıdır. Mənə edilən təzyiqlər il boyu davam edir, bu gizli proses deyil. Hazırkı mərhələdə mən bu tənqidə sakit yanaşıram", - deyə prezident deyib.

Prezidentlə baş nazir İrakli Qaribaşvili arasındakı qarşıdurmanın mövzusu hələ ötən ildən gündəmdədir. İlk olaraq iki lider BMT Baş assambleyasının 69-cu sessiyasında gürcü nümayəndə heyətinə kimin rəhbərlik edəcəyi barədə razılığa gələ bilmirdilər. Daha sonra isə "Gürcü arzusu" hakim koalisiyasının qurucusu Bidzina İvanişvili bəyanatı ilə vəziyyəti daha da gərginləşdirib. O bildirib ki, Marvqvelaşvili hökumət və parlamentlə rəqabət aparmaqla onların işinə mane olur. O zaman hakim koalisiyası nümayəndələrinin çoxluğu bu fikri dəstəkləyib.

Qarşıdurma hökumət üzvlərinin parlamentdə prezidentin illik hesabatına gəlməməsindən sonra alovlanıb. Qaribaşvili bəyan edib ki, nazirlər kabinetinin Marqvelaşvilinin çıxışında iştirak etməsinə ehtiyac yoxdur. O əlavə edib ki, prezidentin hesabatını televizordan da dinləmək mümkündür.

2013-cü ilin oktyabr ayında qüvvəyə minən konstitusiya dəyişiklikləri prezidentin səlahiyyətlərini məhdudlaşdırıb və baş nazirlə parlamentin preroqativlərini genişləndirib. Gürcüstanın yeni hökuməti, "Gürcü arzusu" koaslisiyası 2012-ci ildə parlament seçkisinin nəticələrinə rəhbərliyə gəlib, bir il sonra isə hakim koalisiyadan olan Marqvelaşvili ölkə prezidenti seçilib.

Rəşid Mustafazadə

Ölkə.Az