Nüvə danışıqları “uzatma dəqiqlərinə” qaldı

İran yekun sazişə yaxın olduqlarını bildirsə də, uzun-uzadı danışıqlarda hələ nəticə əldə etmək mümkün olmur

İranın nüvə məsələsi ilə bağlı danışıqlar daha bir gün uzadılıb. Martın 31-i İran və “altılıq” ölkələri arasında anlaşma əldə olunması üçün son gün təyin olunsa da, səhər saat 7-dən gecə saatlarına qədər davam edən danışıqlarda yekun nəticə əldə etmək mümkün olmayıb. Yalnız tərəflər qərara gəliblər ki, danışıqlar daha bir gün davam etsin.

Aprelin 1-də tərəflər yenidən İsveçrənin Lozanna şəhərində danışıqları davam etdirib. Martın 31-də gecə jurnalistlərə açıqlama verən İran xarici işlər naziri Cavad Zərif bildirib ki, bir çox məsələlər artıq yekunlaşıb. Yalnız danışıqlar uzun və gərgin olduğu üçün tərəflərdən bir qismi dincəlməyə ehtiyac duyduğu üçün danışıqların davam etdirilməsi qərara alınıb. Eyni zamanda nazir bildirib ki, çərşənbə günü yekun nəticəyə nail olacaqlarına ümid edir. Ancaq bəzi müşahidəçilər anlaşma əldə olunması üçün hələ də bir sıra həll olunmamış məqamların qaldığı qənaətindədirlər.

Bu arada məlum olub ki, Rusiya xarici işlər naziri Sergey Lavrovdan sonra Fransa xarici işlər naziri Loran Fabius da Lozannanı tərk edərək ölkəsinə qayıdıb. Danışıqlara qatılan Çin nümayəndəsi tərəfləri yekun razılaşma əldə etməyə çağırıb. Xarici işlər naziri Wang Li müzakirələri faydalı olduğunu və yekun anlaşma əldə edilməsi istiqamətində önəmli addımlar atıldığını bildirib. Eyni zamanda o, bildirib ki, yerdə qalan məsələlərin hamısı bir-birinə bağlıdır və tərəflər yekun nəticəyə gəlinməsi üçün yaradıcı düşüncələrini işə salmalıdır.

Qeyd edək ki, yekun razılaşma əldə olunacağı təqdirdə bu il iyulun 1-dək nüvə məsələsi ilə bağlı sazişin imzalanması gözlənilir. Həm İran, həm də danışıqlarda əsas tərəf olan ABŞ yekun sazişi imzalamaqda maraqlı olduqlarını nümayiş etdirməyə çalışır. Bunu danışıqlarda iştirak edən digər ölkələrin yüksək təmsilçilərinin tədricən geri qayıtması, yalnız başlanğıcdan ABŞ və İranın davam etməsi də göstərir.

Eyni zamanda İsrail açıq şəkildə bu sazişin əldə olunmasında maraqlı olmadığını bəyan edib. İsrail hökuməti hesab edir ki, yekun razılaşmanın əldə olunması İrana qarşı embarqoların götürülməsi İslam Respublikasının regionda daha da güclənməsinə səbəb olacaq ki, bu da İsrail üçün böyük təhlükə vəd edir.

Lakin eyni zamanda Obama administrasiyası Yaxın Şərqdə münaqişə mərkəzlərini azaltmaq, gərginliyi yumşaltmaq, nüvə təhlükəsini birdəfəlik aradan qaldırmaq üçün qərarlılıq nümayiş etdirir. (musavat)

Ölkə.Az