Təhsil eksperti: \"Son 15 il ərzində peşə təhsilinin inkişafına ciddi diqqət yetirilməyib\"

"Hər tədris ilində cəmi 10-14 faiz orta məktəb məzunu peşə liseylərinə üz tutur"

"Peşə təhsili bütün dünyada təhsilin ən mühüm pillələrindən sayılır. Yəni əhəmiyyəti məktəbəqədər təhsilin əhəmiyyəti qədərdir. Ancaq Azərbaycanda peşə təhsilinin vəziyyəti o qədər də ürəkaçan deyil. Buna kəmiyyət baxımdan yanaşsaq hər tədris ilində cəmi 10-14 faiz orta məktəb məzunu peşə liseylərinə üz tutur. Bu çox kiçik kontingentdir. Bu, peşə təhsilinə olan bir növ inamsızlıqla bağlıdır".

Bu sözləri Ölkə.az-a təhsil eksperti Etibar Əliyev ölkədəki peşə məktəblərinin vəziyyətini şərh edərkən deyib.

"Son 15 il ərzində peşə təhsilinin inkişafına ciddi diqqət yetirilməyib. Peşə məktəblərinin maddi texniki bazasının yaxşılaşdırılması, müəllim heyətinin təkmilləşdirilməsi, yeni dərsliklərin yazılması istiqamətində deyərdim ki, heç bir ciddi addımlar atılmayıb. Bu sahədə çalışan müəllimlərin əmək haqları həddindən artıq aşağı olduğu üçün çoxları iş yerlərini tərk ediblər.

Bütün xidmət sahələrində bərbər, aşpaz, ustaların böyük əksəriyyəti peşə təhsili ixtisasına yiyələnməyiblər. Sadəcə usta yanında öyrənmiş adamlar sayılırlar. Bu o deməkdir ki, ölkədə peşə təhsili lazımsız olaraq önəmsənir.

Mən hesab edirəm ki, peşə təhsilinin inkişafı üçün yeni strategiya qəbul olunmalıdır. Çünki bu ölkənin iqtisadiyyatının inkişafına, o cümlədən təhsilin inkişafına təkan verəcək əsas məsələ peşə məktəblərindən başlayır.

Fatimə İbrahimova
Ölkə.az