Qubad İbadoğlu: "Yenə də valyuta ehtiyatlarından manatın sabitləşməsi üçün istifadə olunacaq"

"Bu çıxış devalvasiyanın anonsu kimi də qəbul oluna bilər"

"Elman Rüstəmovun Azərbaycan tam üzən məzənnə siyasətinə keçidə hazır deyil bəyanatı hazırkı şəraitdə bir neçə mətləbə aydınlıq gətirdi".

Bu sözləri Ölkə.az-a iqtisadçı ekspert Qubad İbadoğlu deyib.

Onu sözlərinə görə, Mərkəzi Bank bundan sonra hələ də idarə olunan məzənnə siyasətinə üstünlük verəcək.

""Bu o deməkdir ki, yenə də valyuta ehtiyatlarından manatın sabitləşməsi üçün istifadə olunacaq. Bu isə obrazlı şəkildə havaya boş güllə atmaq deməkdir. Belə davam edəcəyi halda, dünya bazarında neft qiymətlərinin bahalaşmayacağı tədqirdə valyuta ehtiyatların tükənməsi və eyni zamanda manatın dolların əsrinə çevrilməsi şübhəsizdir.

İkincisi, “hazırda çoxlu valyuta qazanan cəmi üç təşkilat var" deyib, onlar arasında Azərbaycan Dövlət Neft Fondu, Azərbaycan Dövlət Neft Şirkətinin adını çəkməklə Mərkəzi Bank sədri Azərbaycan iqtisadiyyatının taleyinin neft satışından əldə edilən gəlirlərdən tam şəkildə asılı olduğunu isbatladı.

Üçüncüsü, Elman Rüstəmov "biz tam üzən məzənnə siyasətinə keçsək, bazardan asılı olaraq manat 20-30% ya möhkəmlənə, ya da ucuzlaşa bilər" deməklə aydın şəkildə göstərdi ki, Azərbaycanda formalaşan valyuta bazarı çox bəsit şəkildə inzibati üsullarla idarə olunur, bazarın özünütənzimləmə funksiyası üçün 23 ildə Mərkəzi Bank zəruri instututları və inzibatçılıqdan kənar mexanizmləri hələ də formalaşdıra bilməyib. Vaxtilə neft satışından əldə edilən valyuta gəlirlərinin çox olduğu dövrdə edilməsi vacib olan məzənnə islahatları aparılmayıb.

Nəhayət, bu çıxış devalvasiyanın anonsi kimi də qəbul oluna bilər, həmçinin bu açıqlama göstərdi ki, Azərbaycan Rusiyada olduğu kimi tam üzən məzənnə siyasətinə keçid etsə, manatın dollara nəzərən məzənnəsi kəskin ucuzlaşa və idarəolunmaz səviyyəyə çata bilər"".

Fatimə İbrahimova
Ölkə.az