"İlk İnşaat"dakı kütləvi davanın iki iştirakçısı reanimasiyadadır

Dünən "İlk İnşaat" şirkətinin Bakının Nərimanov rayonu ərazisində tikinti apardığı ərazidə Türkiyə vətəndaşları ilə Azərbaycan vətəndaşları arasında kütləvi davanın baş verdiyi haqda məlumat vermişdik.

Ölkə.az-a bu gün daxil olan məlumata görə, kütləvi dava zamanı həm Türkiyə vətəndaşlarından həm də Azərbaycan vətəndaşlarından bir neçəsi ağır xəsarət alaraq Baku City Hospitala yerləşdirilib.

Xəsarət alanların vəziyyətini öyrənmək üçün "Baku City Hospital"la əlaqə saxladıq. Baku City Hospitalın qəbul şöbəsinin həkimi İsmayılova Gülnaz bildirdi ki, dünən klinikaya "İlk inşaaat"ın 5 işçisi gətirilib. Onlardan biri gözündən xəsrət alıbmış, ona ambulator yardım göstərildikdən sonra evə buraxıblar.

Gülnaz İsmayılovanın sözlərinə görə, digər 4 xəsarət alan şəxs isə reanimasiya şöbəsinə yerləşdirilib. Xəstələrdən ikisi Türkiyə vətəndaşı, ikisi isə Azərbaycan vətəndaşıdır. Türkiyəli xəstələrin vəziyyəti yaxşı olduğu üçün səhər saatlarında palataya köçürülüblər. Digər xəsarət alan iki Azərbaycan vətəndaşı isə hələ də reanimasiyadadır. Həkimin sözlərinə görə, xəsarət alanların həyatı üçün ciddi təhlükə yoxdur.

Səxavət Məmməd
Ölkə.Az