Fazil Mustafa: \"Elman Rüstəmovun yenidən seçilməsinin əleyhinə təkcə mən səs verdim\"

"Elman Rüstəmov kifayət qədər savadlı və təcrübəli kadrdır"

Ölkə.az xəbər verir ki, bu sözləri millət vəkili Fazil Mustafa öz facebook səhifəsində yazıb.

Deputat Elman Rüstəmovun yenidən seçilməsinin əleyhinə səs verməsinə görə, izahlı status yazıb.

"Arqumentim bu idi ki, Elman Rüstəmov kifayət qədər savadlı və təcrübəli kadrdır, ola bilsin ki, bu iqtidar üçün də xüsusi dəyəri olan kadr sayılır, ancaq heç bir yüksək çinli dövlət məmurunun xalqı aldatmağa mənəvi haqqı çatmır. Manatın devalvasiyası məsələsində mövqeyi haqlı olaraq insanlarımızda əsəb gərginliyinə səbəb olmuşdu”.

Qeyd edək ki, Bu gün Milli Məclisdə Azərbaycan Respublikası Mərkəzi Bankı İdarə Heyətinin üzvlərinin təyin edilməsi haqqında məsələ müzakirə edilib. Elman Rüstəmovun Azərbaycan Mərkəzi Bankının İdarə Heyətinin üzvlüyünə namizədliyi səsə qoyularaq təsdiq edilib.

Xatırladaq ki, E.Rüstəmov 20 ildir ki, Azərbaycan Respublikası Prezidentinin sərəncamı ilə Azərbaycan Respublikası Mərkəzi Bankının İdarə Heyətinin sədri vəzifəsində çalışır.

Fatimə İbrahimova
Ölkə.az