“National Geographic Azərbaycan” jurnalı “AITF 2015” sərgisində iştirak edir

Sərgi aprelin 4-dək davam edəcək.

Bakı Ekspo Mərkəzində 14-cü Azərbaycan Beynəlxalq “Turizm və Səyahətlər” (“AITF 2015”) sərgisi keçirilir.

Müasir turizm bazarının ümumi mənzərəsini əks etdirən “AITF” sərgisi 4 aprel tarixinə qədər davam edəcək.

“AITF 2015” sərgisində Argentina, Bolqarıstan, İran, Gürcüstan, Dominikan Respublikası, Hindistan, Malayziya, Mərakeş, BƏƏ, Sloveniya, Tailand, Türkiyə və digər ölkələrdən 17 milli qrup iştirak edir, Maldiv adaları isə milli stendlər arasında debütantdır. Sərgidə Azərbaycan Respublikası Mədəniyyət və Turizm Nazirliyi, eləcə də Azərbaycan Turizm Assosiasiyasının (AzTA) himayəsi altında bir-birindən fərqli təkliflərlə çıxış edən yerli turoperatorlar da var.

“National Geographic Azərbaycan” jurnalı da sərgidə iştirak edib. Jurnalın Azərbaycanda 6 aylıq fəaliyyəti barədə ziyarətçilərə geniş məlumat verilib. Əhatə olunan mövzular, fotoşəkillər və yerli rubrikalarla yaxından maraqlanan ziyarətçilərin sualları ətraflı cavablandırılıb və jurnalın bir neçə buraxılışı onlara təqdim edilib.

Xatırladaq ki, “Garant Media Holding” ilə “National Geographic” Cəmiyyəti arasında 2014-cü ilin mart ayında imzalanmış müqaviləyə əsasən, “National Geographic Azərbaycan” jurnalı 1 sentyabr 2014-cü ildən etibarən doğma dilimizdə nəşr edilərək oxuculara təqdim edilmişdi.

Əlavə olaraq qeyd etmək istərdik ki, 2014-cü il 12 noyabrdan “Garant Media Holding” və “National Geographic” Cəmiyyəti arasında “National Geographic Kids” uşaq jurnalının da Azərbaycanda dərc olunması ilə bağlı müqavilə imzalandı. 1975-ci ildə “National Geographic World” adı ilə ABŞ-da nəşr olunaraq uşaqların yalnız coğrafi biliklərlə maarifləndirilməsi məqsədi daşımış “National Geographic Kids” jurnalı 2000-ci ildən etibarən bu ad altında daha çoxsaylı rubrikaları ilə 6-14 yaşlı oğlan və qızlara təqdim olunur. (oxu.az)

Ölkə.Az