Əli Məsimli: "Ərəb şirkətləri Azərbaycanda geniş miqyaslı fəaliyyət göstərə bilərlər"
"Azərbaycan prezidenti İlham Əliyevin Səudiyyə Ərəbistanına səfəri dünyanın kataklizmli bir dövründə Azərbaycanın dövlət maraqlarının daha dolğun şəkildə ifadə etməsi istiqamətində apardığı fəaliyyətin tərkib hissəsidir"
"Azərbaycan, yeni müstəqil bir dövlət olaraq dünyanın bütün ölkələrini ilə bərabərhüquqluqluq və qarşılıqlı faydalılıq prinsipləri əsasında əməkdaşlıq siyasəti yeridir. Azərbaycan prezidenti İlham Əliyevin Səudiyyə Ərəbistanına səfərini də hər şeydən əvvəl bu kontekstdən dəyərləndirmək lazımdır. Eyni zamanda yaşadığımız dövrdə geosiyasi durum bir sıra kataklizmlərlə zənginləşərək çox mütəhərrik və təhlükəli olub. Ukrayna böhranını, Yaxın Şərqdə, Afrika ölkələrində davam edən xaos dünyanı qeyri-müəyyənliyə sürükləyir. Belə bir şəraitdə Azərbaycanın dövlət maraqlarına cavab verən daha çevik siyasət həyata keçirmək tələb olunur. Azərbaycan prezidenti də məhz bununla məşğul olaraq Azərbaycanın maraqlarının qlobal və regional səviyyədə daha dolğun şəkildə reallaşmasına yönəlmiş fəaliyyət göstərir".
Bu sözləri Ölkə.az-a açıqlamasında "İqtisadi və Sosial İnnovasiyalar İnstitutu"nun rəhbəri, millət vəkili Əli Məsimli deyib.
"Bu baxımdan Azərbaycan prezidenti İlham Əliyevin Səudiyyə Ərəbistanına səfəri dünyanın kataklizmli bir dövründə Azırbaycanın dövlət maraqlarının daha dolğun şəkildə reallaşdırılmasına yönəlik fəaliyyətin tərkib hissəsidir. Azərbaycan prezidentinin Səudiyyə Ərəbistanına səfəri zamanı keçirdiyi görüşlər və apardığı danışıqlar belə bir fikir yürütməyə əsas verir ki, bu səfər iki ölkə arasında əməkdaşlığın genişləndirilməsi və dərinləşməsi istiqamətində mövcud potensialdan daha dolğun istifadə edilməsinə müsbət dinamizm verəcək. Neft və kimya sənayesi, neft-qaz, kənd təsərrüfatı məhsullarının birgə istehsalı, Səudiyyə Ərəbistanına və üçüncü ölkələrə ixracı imkanlarının genişlənməsi və sair istiqmətlərdə mövcud imkanlardan istifadənin dairəsi genişlənəcək. Eyni zamanda Səudiyyə Ərəbistanı şirkətləri Azərbaycanda həm bilavasitə investor, həm də birgə müəssisələr yaradılmasında iştirak etməklə geniş miqyaslı fəaliyyət göstərə bilərlər".
Xatırladaq ki, aprelin 5-də Ər-Riyadda Azərbaycan Respublikasının Prezidenti İlham Əliyevin və Səudiyyə Ərəbistanı Krallığının neft və minerallar naziri Əli Əl Naimi ilə görüşlər baş tutub.
Görüşdə ikitərəfli əməkdaşlıq barədə geniş müzakirələr aparılıb.
Fatimə İbrahimova
Ölkə.az
